വാഷിംഗ്ടൺ : ഇന്ത്യൻ വിദ്യാർത്ഥിയെ അമേരിക്കയിലെ പർഡ്യൂ സർവകാലശാലയിൽ മരിച്ച നിലയിൽ കണ്ടെത്തി. നീൽ ആചാര്യ എന്ന വിദ്യാർത്ഥിയാണ് മരിച്ചതെന്ന് അധികൃതർ അറിയിച്ചു. സർവകലാശാലയോട് ചേർന്നുള്ള റോഡിൽ ആയിരുന്നു നീൽ ആചാര്യയെ മരിച്ച നിലയിൽ കണ്ടെത്തിയത്. വിദ്യാർത്ഥിയെ കഴിഞ്ഞ രണ്ടു ദിവസമായി കാണാൻ ഇല്ലായിരുന്നു.
പിന്നാലെ മാതാവ് ഗൗരി ആചാര്യ എക്സിൽ പോസ്റ്റ് പങ്കിട്ടിരുന്നു. പർഡ്യൂ സർവകലാശാലയിൽ എത്തിച്ച ഊബർ ഡ്രൈവറാണ് അവസാനമായി നീലിനെ കണ്ടതെന്നും എന്തെങ്കിലും വിവരം ലഭിക്കുന്നവർ അറിയിക്കണമെന്നും സഹായിക്കണമെന്നുമായിരുന്നു മാതാവ് പോസ്റ്റിൽ പറഞ്ഞിരുന്നത്.
ഇതിന് പിന്നാലെയാണ് വിദ്യാർത്ഥിയെ മരിച്ച നിലയിൽ കണ്ടെത്തിയത്. തുടർന്ന് ചിക്കാഗോയിലെ ഇന്ത്യൻ കോൺസുലേറ്റ് ജനറലാണ് കുടുംബത്തെ മരണ വിവരം അറിയിച്ചത്. സാധ്യമായ എല്ലാ സഹായം നൽകുമെന്നും കോൺസുലേറ്റ് വ്യക്തമാക്കി. എന്നാൽ എങ്ങനെയാണു വിദ്യാർത്ഥി മരിച്ചതെന്ന് വ്യക്തമല്ല.
സർവകലാശാലയിലെ കമ്പ്യൂട്ടർ സയൻസ് ഡിപ്പാർട്ട്മെന്റിലെ വിദ്യാർത്ഥിയായിരുന്നു നീൽ. സംഭവത്തിൽ ദുരൂഹത ആരോപിച്ച് കുടുംബം രംഗത്തെത്തിയിട്ടുണ്ട്.
