അങ്ങാടിക്കല്‍ : നാല്‍പ്പത്തഞ്ചുകാരന്‍ സ്വന്തംവീടിന് തീയിട്ടു നശിപ്പിച്ചു. പത്തനംതിട്ട അങ്ങാടിക്കലില്‍ ഞായറാഴ്ച വൈകിട്ട് അഞ്ചുമണിയോടെയാണ് ഇയാൾ വീടിന് തീയിട്ടത്. സുനിലും അമ്മയുമാണ് ഈ വീട്ടില്‍ താമസിച്ചിരുന്നത്. സുനില്‍ വീടിന് തീയിട്ട സമയത്ത് അമ്മ വീട്ടിലുണ്ടായിരുന്നില്ല. അലമാരയിലുണ്ടായിരുന്ന തുണി വാരിയിട്ട് അതിനു മുകളില്‍ വിറക് അടുക്കി തീകൊളുത്തുകയായിരുന്നു. ലഹരി ഉപയോഗിച്ച ശേഷം സമനില നഷ്ടമായതോടെയായിരുന്നു അതിക്രമം
ഇലക്ട്രിക് ഉപകരണങ്ങള്‍, ജനല്‍, കതക്, തുണി എന്നിവ കത്തി നശിച്ചിട്ടുണ്ട്. തീപിടിച്ച വിവരം അറിഞ്ഞ സമീപവാസികള്‍ ഗ്രാമപ്പഞ്ചായത്ത് അംഗത്തെ വിവരം അറിയിച്ചു. തുടര്‍ന്ന് അടൂരിലെ ഫയര്‍ ഫോഴ്‌സ് യൂണിറ്റിനെ വിവരം അറിയിച്ചു. എന്നാല്‍ ഫയര്‍ ഫോഴ്‌സ് എത്തുമ്പോഴേക്കും വീട് ഏതാണ്ട് കത്തി നശിച്ചിരുന്നു.
സുനിലിനെ മാനസികനില തെറ്റിയ നിലയിലാണ് സമീപത്തുനിന്ന് കണ്ടെത്തിയത്. പിന്നീട് ഫയര്‍ ഫോഴ്‌സ് അംഗങ്ങള്‍ സുനിലിനെ ബലമായി കീഴ്‌പ്പെടുത്തി പോലീസിന് കൈമാറി. മദ്യം അടക്കമുള്ള ലഹരി സുനില്‍ പതിവായി ഉപയോഗിച്ചിരുന്നതായാണ് വിവരം.
