ഭാരം കുറച്ച് സ്ലിം ആകാന്‍ ആഗ്രഹിക്കുന്നവര്‍ക്ക് പ്രചോദനമായി നിത അംബാനി. ഡയറ്റും വ്യായാമവും ചെയ്ത് ഏതാനും മാസങ്ങള്‍ക്കുള്ളില്‍ നിത കുറച്ചത് 18 കിലോയാണെന്നതാണ് ഏവരെയും അമ്പരിപ്പിക്കുന്ന കാര്യം. മകന്‍ ആനന്ദ് അംബാനി സെലിബ്രിറ്റി കോച്ച് വിനോദ് ചോപ്രയ്ക്ക് കീഴിലുള്ള പരിശീലനത്തിലൂടെ രണ്ട് വര്‍ഷം കൊണ്ട് 100 കിലോ കുറച്ചപ്പോള്‍ കട്ടയ്ക്ക് കൂടെനിന്നത് നിത അംബാനിയായിരുന്നു.
പഴങ്ങളും പച്ചക്കറികളും നട്ടും സീഡുകളും അടങ്ങിയ ഭക്ഷണക്രമവും യോഗ, നീന്തല്‍, ജിം ഉള്‍പ്പെടെയുള്ള വ്യായാമ മുറകളും ഇതിന് നിതയെ ഭാരം കുറയ്ക്കാൻ സഹായിച്ചു. എന്നാല്‍ ഇതു കൂടാതെ നിതയുടെ ഭാരം കുറച്ച രണ്ട് പ്രധാനപ്പെട്ട കാര്യങ്ങള്‍ കൂടെയുണ്ട്. ഭാരം കുറയ്ക്കാനായി നിത പ്രധാനമായി ചെയ്തത് രണ്ട് കാര്യങ്ങളാണ്. ദിവസവും ബീറ്റ്‌റൂട്ട് ജ്യൂസ് കുടിച്ചു, നൃത്തം ചെയ്യാൻ സമയം മാറ്റിവച്ചു. പോഷകങ്ങളടങ്ങിയ പച്ചക്കറിയാണ് ബീറ്റ്‌റൂട്ട്, ഡയറ്റിംഗിന്റെ ഭാഗമായി ദിനവും രണ്ട് ഗ്ലാസോളം ജ്യൂസ് നിത കുടിച്ചിരുന്നു. വയറിനെ ശുദ്ധികരിക്കുന്നതിനൊപ്പം രക്തസമ്മർദ്ദം കുറയ്ക്കാനും ബീറ്റ്‌റൂട്ട് സഹായിക്കുന്നുവെന്നാണ് പഠന റിപ്പോർട്ട്.
സീറോ ഫാറ്റും വളരെ കുറിച്ച് കാലറിയുമുള്ള ബീറ്റ്‌റൂട്ട് ജ്യൂസ് വയറിനെ ശുദ്ധീകരിക്കുകയും ശരീരത്തിന് ആവശ്യമായ പോഷകം നല്‍കുകയും ചെയ്യും. ഇതിലെ ആന്റി ഓക്‌സിഡന്റുകള്‍ കൊഴുപ്പ് നിക്ഷേപവും ശരീരത്തിലെ വിഷാംശവും കുറച്ച് ഭാരക്കുറവിന് സഹായകമാകും. ധാതുക്കളാലും സമ്പന്നമാണ് ബീറ്റ് റൂട്ട്. രക്ത സമ്മര്‍ദം കുറയ്ക്കാനും ഇത് സഹായിക്കും. ഭരതനാട്യം പോലുള്ള ക്ലാസിക്കല്‍ നൃത്തരൂപങ്ങളില്‍ പരിശീലനം നേടിയിട്ടുള്ള ആളാണ് നിത. എല്ലാ ദിവസവും നൃത്തത്തിനായി അവർ സമയം മാറ്റിവയ്ക്കുമായിരുന്നു. മകന്‍ ആനന്ദ് ഡയറ്റ് ചെയ്തും തീവ്ര പരിശീലനത്തിലൂടെയുമാണ് ഭാരം കുറച്ചത്. ആനന്ദിന്റെ ഡയറ്റിങ്ങ് തനിക്കും ഏറെ പ്രചോദനമായതായി നിത പറഞ്ഞു.
