തിരുവനന്തപുരം: ട്രാവന്കൂര് ടൈറ്റാനിയം പ്രൊഡക്റ്റ്സ് ലിമിറ്റഡില് നിന്ന് ഫര്ണസ് ഓയില് ഡ്രൈനേജ് വഴി കടലിലേക്ക് ഒഴുകിയ സംഭവത്തില് വിശദമായ അന്വേഷണം നടത്തും. അന്വേഷണത്തിന് സര്ക്കാര് മൂന്നംഗ ഉന്നത ഉദ്യോഗസ്ഥ സമിതിയെ നിയോഗിച്ചു. വ്യവസായ വകുപ്പ് പ്രിന്സിപ്പല് സെക്രട്ടറി മുഹമ്മദ് ഹനീഷ്, കഐംഎംഎല് എംഡി എസ്.ചന്ദ്രബോസ്, മലബാര് സിമന്റ്സ് എംഡി എം.മുഹമ്മദാലി എന്നിവരാണ് സമിതിയില്.
സംഭവത്തില് മലനീകരണ നിയന്ത്രണ ബോര്ഡ് അന്വേഷണം നടത്തുമെന്ന് നേരത്തെ തിരുവനന്തപുരം ജില്ലാ കളക്ടര് നവ്ജ്യോത് ഖോസ പ്രഖ്യാപിച്ചിരുന്നു. പ്രാഥമിക അന്വേഷണത്തില് ഉപകരണങ്ങളുടെ കാലപ്പഴക്കമാണ് ഫര്ണസ് ഓയില് ചോര്ച്ചയ്ക്ക് കാരണമെന്നാണ് റിപ്പോര്ട്ട്. ഇക്കാര്യത്തില് വിശദമായ അന്വേഷണം ആവശ്യമാണെന്ന് നിരീക്ഷിച്ചാണ് സര്ക്കാര് ഉന്നത ഉദ്യോഗസ്ഥരെ പരിശോധനയ്ക്ക് നിയോഗിച്ചിരിക്കുന്നത്. 10 ദിവസത്തിനകം സമിതി റിപ്പോര്ട്ട് സമര്പ്പിക്കണം.
ബുധനാഴ്ച പുലര്ച്ചെയാണ് ട്രാവന്കൂര് ടൈറ്റാനിയം ഫാക്ടറിയിലെ ഗ്ലാസ് ഫര്ണസ് പൈപ്പ് തകര്ന്ന് ഫര്ണസ് ഓയില് കടലിലേക്ക് ഒഴുകിയത്. സംഭവം പ്രദേശത്ത് പരിഭ്രാന്തി പടര്ത്തിയതോടെ ബീച്ചില് ജനങ്ങള് ഇറങ്ങുന്നത് ജില്ലാ ഭരണകൂടം വിലക്കി.