മട്ടന്നൂര്: കണ്ണൂര് മട്ടന്നൂര് പത്തൊമ്പതാം മൈലില് ആക്രി സാധനങ്ങള് ശേഖരിച്ചു വെച്ച വീട്ടിനുള്ളില് ഉണ്ടായ സ്ഫോടനത്തില് രണ്ടു മറുനാടന് തൊഴിലാളികള് മരിച്ചു. അസം സ്വദേശികളായ ഫസല് ഹഖ് (45), മകന് ഷഹിദുള് (22) എന്നിവരാണ് മരിച്ചത്. ബുധനാഴ്ച വൈകിട്ട് ആറോടെ പത്തൊമ്പതാംമൈല് കാശിമുക്ക് നെല്യാട് ക്ഷേത്രത്തിന് സമീപത്തെ ഓടുമേഞ്ഞ ഇരുനില വീട്ടിനുള്ളിലാണ് സ്ഫോടനം നടന്നത്.
ശബ്ദം കേട്ട് കേട്ട് പരിസരവാസികള് എത്തിയപ്പോഴാണ് വീടിന്റെ രണ്ടാം നിലയില് ഒരാളെ മരിച്ച നിലയില് കണ്ടത്. ഗുരുതരമായി പരിക്കേറ്റ മറ്റൊരാളെ ഉടന് പരിയാരം മെഡിക്കല് കോളേജ് ആശുപത്രിയില് പ്രവേശിപ്പിച്ചെങ്കിലും മരിച്ചു. സ്ഫോടനത്തില് വീടിന്റെ മേല്ക്കൂര തകര്ന്നിട്ടുണ്ട്. വീടുകളില് നിന്നും മറ്റും ആക്രി സാധനങ്ങള് ശേഖരിച്ച് വില്ക്കുന്ന മറുനാടന് തൊഴിലാളികള് മാസങ്ങളായി ഈ വീട്ടില് താമസിച്ചു വരികയായിരുന്നു.