അബുദാബി: യുഎഇയില് കനത്ത മഴ. അബുദാബിയിലും ദുബൈയിലും ഇന്ന് പുലര്ച്ചെ ശക്തമായ മഴയാണ് ലഭിച്ചത്. മഴയ്ക്കൊപ്പം ശക്തമായ കാറ്റും ആലിപ്പഴ വർഷവും ഉണ്ടായി. പുലര്ച്ചെ മൂന്ന് മണിക്ക് ഇടിയും മിന്നലും ഉണ്ടായിരുന്നു. ശക്തമായ മഴയെ തുടര്ന്ന് ദേശീയ കാലാവസ്ഥ കേന്ദ്രം രാജ്യത്ത് ഓറഞ്ച് അലര്ട്ട് പ്രഖ്യാപിച്ചിട്ടുണ്ട്.
അല് ദഫ്ര, അല് സില പ്രദേശങ്ങളിലാണ് കനത്ത മഴ ആദ്യം റിപ്പോര്ട്ട് ചെയ്തത്. ഇന്ന് രാത്രി എട്ടു മണി വരെ അസ്ഥിരമായ കാലാവസ്ഥയ്ക്ക് സാധ്യതയുണ്ടെന്നാണ് അറിയിപ്പ്. മെയ് രണ്ട്, മൂന്ന് തീയതികളില് മഴയ്ക്ക് സാധ്യതയുണ്ടെന്ന് നേരത്തെ അറിയിപ്പ് നല്കിയിരുന്നു. ഇതേ തുടര്ന്ന് ജാഗ്രതാ നിര്ദ്ദേശങ്ങളും നല്കിയിരുന്നു. ഷാര്ജയിലും ദുബൈയിലും സ്കൂളുകള്ക്ക് വിദൂര പഠനം ഏര്പ്പെടുത്തി. സർക്കാർ ജീവനക്കാർക്ക് വർക്കം ഫ്രം ഹോമും നൽകിയിട്ടുണ്ട്. എന്നാൽ നേരിട്ട് ജോലി ചെയ്യുന്ന സർക്കാർ ജീവനക്കാരെ വിദൂര ജോലിയിൽ നിന്ന് ഒഴിവാക്കിയിട്ടുണ്ട്.
സ്വകാര്യ ജീവനക്കാർക്ക് വീട്ടിലിരുന്ന് ജോലി ചെയ്യാനും ജോലി സമയത്തിൽ ഇളവ് നൽകാനും ആഭ്യന്തരമന്ത്രാലയം നിർദേശിച്ചു. ദുബായ് മെട്രോ പ്രവർത്തനസമയം അഞ്ച് മണിക്കൂർ നീട്ടി പുലർച്ചെ അഞ്ച് വരെയാക്കി. വിമാനയാത്രക്കാരുടെ സൗകര്യം കണക്കിലെടുത്താണ് ഇത്. ഷാർജയിൽ പാർക്കുകളും അടച്ചിട്ടിരിക്കുകയാണ്. ജനങ്ങൾ ജാഗ്രത പാലിക്കണമെന്നും അത്യാവശ്യത്തിനല്ലാതെ പുറത്തിറങ്ങരുതെന്നും ദുബായ് പൊലീസ് മുന്നറിയിപ്പ് നൽകി.