റേഞ്ച് റോവര്‍ സ്പോര്‍ട്സ് ബ്ലാക്ക് എഡിഷന്‍ സ്വന്തമാക്കിയിരിക്കുകയാണ് നടിയും അവതാരകയുമായ നൈല ഉഷ. മകനൊപ്പം എത്തി പുതിയ കാര്‍ സ്വന്തമാക്കുന്നതിന്റെ ചിത്രങ്ങള്‍ നൈല തന്നെയാണ് സമൂഹമാധ്യമങ്ങളില്‍ പോസ്റ്റ് ചെയ്തത്.”സേ ഹലോ ടൂ മൈ ന്യൂ റൈഡ്” എന്ന ക്യാപ്ഷനിലാണ് താരം ഇന്‍സ്റ്റയില്‍ ചിത്രങ്ങള്‍ പോസ്റ്റ് ചെയ്തത്. നേരത്തെ വെള്ള നിറത്തിലുള്ള ഔഡി എ7 ആയിരുന്നു നൈലയ്ക്ക് സ്വന്തമായി ഉണ്ടായിരുന്ന വാഹനം.
ഇഷ്ടനിറത്തിലുള്ള തന്റെ സ്വപ്ന വാഹനം സ്വന്തമാക്കിയ സന്തോഷം താരം തന്നെയാണ് സാമൂഹിക മാധ്യമങ്ങളില്‍ പങ്കുവെച്ചത്. മനോഹരമായ റേഞ്ച് റോവര്‍ സ്‌പോട്ട് എച്ച്.എസ്.ഇ. ബ്ലാക്ക് എഡിഷന്‍ സ്വന്തമാക്കി. ഈ സുന്ദര നിമിഷത്തിലേക്ക് എന്നെ എത്തിച്ച എല്ലാവര്‍ക്കും നന്ദി, ശ്രദ്ധയുള്ള ഡ്രൈവര്‍ ആയിരിക്കുമെന്ന് ഉറപ്പ് നല്‍കുന്നു എന്ന കുറിപ്പോടെയാണ് താരം തന്റെ പുതിയ വാഹനത്തിന്റെ വിശേഷം പങ്കുവെച്ചിട്ടുള്ളത്.
റേഡിയോ ജോക്കിയായി ജോലി ചെയ്യുന്നതിനിടെ മമ്മൂട്ടിയുടെ നായികയായി ‘കുഞ്ഞനന്തന്റെ കട’ എന്ന ചിത്രത്തിലൂടെയാണ് നൈല സിനിമയില്‍ അരങ്ങേറ്റം കുറിച്ചത്. ഗ്യാങ്ങ്സ്റ്റര്‍, ഫയര്‍മാന്‍, പത്തേമാരി തുടങ്ങിയ മമ്മൂട്ടി ചിത്രങ്ങളിലും നൈല അഭിനയിച്ചു. ജോഷി സംവിധാനം ചെയ്ത ‘പൊറിഞ്ചു മറിയം ജോസ്’ ആണ് നൈലയുടെ അവസാനം തിയേറ്ററുകളിലെത്തിയ ചിത്രം.
