തിരുവനന്തപുരം: പാറശ്ശാലയിൽ ഭാര്യയെ തലയ്ക്കടിച്ച് കൊലപ്പെടുത്താൻ ശ്രമിച്ച് ഭർത്താവിനെതിരെ കേസെടുത്ത് പൊലീസ്. പാറശ്ശാല സ്വദേശി ഷെറീബയെ ആണ് ഭർത്താവ് രാമൻ കറിച്ചട്ടികൊണ്ട് തലയ്ക്കടിച്ചുകൊലപ്പെടുത്താൻ ശ്രമിച്ചത്. പരിക്കേറ്റ യുവതി താലൂക്ക് ആശുപത്രിയിൽ ചികിത്സ തേടി.
ഭർത്താവും സഹോദരിയും ചേർന്ന് മർദ്ദിച്ച ശേഷം ചട്ടിയെടുത്ത് തലയ്‌ക്കടിച്ചെന്ന് യുവതി പൊലീസിനോട് പറഞ്ഞു. അടിയേറ്റ ഉടൻ യുവതി നിലവിളിച്ചുകൊണ്ട് വീടിന് പുറത്തേക്ക് ഇറങ്ങിയോടി. നാട്ടുകാർ വിവരമറിയിച്ചതിനെ തുടർന്ന് സ്ഥലത്തെത്തിയ പൊലീസ് യുവതിയെ ആശുപത്രിയിൽ പ്രവേശിപ്പിക്കുകയായിരുന്നു.
രാമന്റെ രണ്ടാം ഭാര്യയാണ് ഷെറീബ. ആദ്യ ഭാര്യയെ ഉപേക്ഷിച്ച ശേഷം മൂന്ന് വർഷങ്ങൾക്ക് മുമ്പാണ് രാമൻ ഷെറീബയ്‌ക്കൊപ്പം താമസം ആരംഭിച്ചത്. ഭർത്താവ് ദിവസവും തന്നെ മർദിക്കാറുണ്ടെന്നും ബ്ലേഡ് ഉപയോഗിച്ച് കയ്യിൽ മുറിവേൽപ്പിക്കാറുണ്ടെന്നും യുവതി പറഞ്ഞു. പരിശോധനയിൽ യുവതിയുടെ ശരീരത്തിൽ മുറിവേറ്റ പാടുകൾ കണ്ടെത്തി. നിലവിൽ പാറശ്ശാല താലൂക്ക് ആശുപത്രിയിൽ ചികിത്സയിൽ കഴിയുന്ന യുവതിയെ ആവശ്യമെങ്കിൽ മെഡിക്കൽ കോളേജ് ആശുപത്രിയിലേക്ക് മാറ്റുമെന്ന് പൊലീസ് അറിയിച്ചു.
