ഇന്ന് നവംബർ 16 ബുധനാഴ്ച. ഇക്കൊല്ലത്തെ മണ്ണാറശാല ആയില്യം ഇന്നാണ്. നാഗദൈവങ്ങൾക്കു പ്രാധാന്യമുള്ള ദിനമാണ് ഓരോ മാസത്തിലെയും ആയില്യം നാൾ. തുലാമാസത്തിലെ ആയില്യം നാളിലാണ് ‘മണ്ണാറശാല ആയില്യം’. പരിസ്ഥിതിയുടെയും വിശ്വാസത്തിന്റെയും സംരക്ഷിത കേന്ദ്രങ്ങളാണു കാവുകൾ എന്ന് ചൂണ്ടിക്കാട്ടി തരുന്ന മണ്ണാറശാല. പതിനാലു ഏക്കറോളം വരുന്ന കാവിനുള്ളിലാണു മണ്ണാറശാല നാഗരാജ ക്ഷേത്രവും ഇല്ലവും ഉള്ളത്.
വാസുകീ ചൈതന്യത്തെ സങ്കൽപ്പിച്ചു ശൈവപൂജാ രീതിയാണ് മണ്ണാറശാലയിൽ നടക്കുന്നത്. നാഗരാജാവിന്റെ ശ്രീകോവിലിനു വടക്ക് മറ്റൊരു ശ്രീകോവിലിൽ സർപ്പയക്ഷിയമ്മയുടെ പ്രതിഷ്ഠ. സ്‌ത്രീയാണ് ക്ഷേത്രത്തിലെ മുഖ്യ പൂജാരിണി . ‘മണ്ണാറശാല അമ്മ’ എന്നറിയപ്പെടുന്ന പൂജാരിണിയെ ഭക്‌തർ നാഗദൈവങ്ങളുടെ പ്രതിരൂപമായാണ് കാണുന്നത്. പുലർച്ചെ ഇല്ലത്തെ നിലവറയിലും തെക്കേ തളത്തിലും വിളക്ക് തെളിക്കുന്നത് അമ്മയാണ്. കന്നി, തുലാം, കുംഭ മാസങ്ങളിലെ ആയില്യവും ശിവരാത്രിയുമാണ് മണ്ണാറശാലയിലെ പ്രധാന ആഘോഷദിനങ്ങൾ.
മണ്ണാറശാല ആയില്യത്തോടനുബന്ധിച്ച് നടത്തുന്ന എഴുന്നള്ളത്ത് പ്രധാനപ്പെട്ട ചടങ്ങായിട്ടാണ് കണക്കാക്കുന്നത്. ഉച്ചപൂജക്ക് ശേഷമാണ് പ്രസിദ്ധമായ ആയില്യം എഴുന്നളളത്ത് നടക്കുക. നാഗരാജാവിന്റെയും മറ്റു നാഗദൈവങ്ങളുടെയും വിഗ്രഹങ്ങൾ ഇല്ലത്തെ തെക്കേ തളത്തിലേക്ക് എഴുന്നള്ളിക്കും. ആയില്യദിനത്തിൽ നാഗദേവതകളെ പ്രാർഥിച്ചാൽ കുടുംബ ഐശ്വര്യവും ഐക്യവും വർധിക്കും എന്നാണ് ഹൈന്ദവ വിശ്വാസം.
തുലാമാസത്തിലെ ആയില്യം നക്ഷത്ര ദിവസം വഴിപാടുകൾ സമർപ്പിക്കുന്നത് സർപ്പദോഷം തീരുവാനും സർപ്പങ്ങളുടെ അനുഗ്രഹം ലഭിക്കാനും ഉത്തമമാണ്. മണ്ണാറശ്ശാലയിൽ തൊഴാൻ സാധിച്ചാൽ നന്ന്. അതിനു കഴിയാത്തവർ വീടിന് അടുത്തുള്ള സർപ്പപ്രതിഷ്ഠയുള്ള ക്ഷേത്രങ്ങളിൽ വഴിപാടുകൾ സമർപ്പിച്ചു പ്രാർഥിക്കാം.
