ഐ.എന്‍.എക്‌സ്. മീഡിയാ അഴിമതിക്കേസില്‍ എന്‍ഫോഴ്‌സ്‌മെന്റ് ഡയറക്ടറേറ്റിന്റെ കസ്റ്റഡിയിലുള്ള പി. ചിദംബരത്തിന് അസഹ്യമായ വയറുവേദനയെന്ന് മുതിര്‍ന്ന അഭിഭാഷകന്‍ കപില്‍ സിബല്‍. ജയില്‍വാസത്തിനിടെ രണ്ടുവട്ടം ചിദംബരത്തിന് അസഹ്യമായ വയറുവേദന ഉണ്ടായി. അദ്ദേഹത്തെ പതിവായി ചികിത്സിക്കുന്ന ഹൈദരാബാദിലെ ഡോക്ടറുടെ സേവനം ഉടന്‍ ലഭ്യമാക്കണമെന്നും ചിദംബരത്തിന്റെ ജാമ്യാപേക്ഷയില്‍ നടന്ന വാദത്തിനിടെ കപില്‍ സിബല്‍ വ്യക്തമാക്കി.
അതേസമയം ഇ.ഡിക്കുവേണ്ടി ഹാജരായ സോളിസിറ്റര്‍ ജനറല്‍ തുഷാര്‍ മേത്ത വിഷയത്തെ വൈകാരികമായി സമീപിക്കരുതെന്ന് അറിയിക്കുകയുണ്ടായി. ഡല്‍ഹി എയിംസിലെ ഡോക്ടര്‍മാരുടെ നിരീക്ഷണത്തിലാണ് ചിദംബരമെന്നും ഇതിനു മുന്‍പ് ഏതെങ്കിലും കുറ്റാരോപിതരെ അവരുടെ ഇഷ്ടപ്രകാരം അവര്‍ തന്നെ നിര്‍ദേശിക്കുന്ന ആശുപത്രികളില്‍ പ്രവേശിപ്പിച്ച ചരിത്രമുണ്ടോയെന്നും മേത്ത ചോദിക്കുകയുണ്ടായി. ഇതിനിടെ പി. ചിദംബരത്തിന്റെ കസ്റ്റഡി കാലാവധി നീട്ടി. ഒക്ടോബര്‍ 30 വരെ എന്‍ഫോഴ്‌സ്‌മെന്റ് ഡയറക്ടറേറ്റ് കസ്റ്റഡിയില്‍ ചിദംബരത്തെ വിട്ടു.
