കൊച്ചിയിൽ മലമ്പാമ്പിന്റെ ആക്രമണത്തിൽ യുവാവിന് ഗുരുതര പരിക്ക്. അളമ്പിൽ വീട്ടിൽ സന്തോഷിനാണ് മലമ്പാമ്പിന്റെ ആക്രമണത്തിൽ പരിക്കേറ്റത്. എറണാകുളം കങ്ങരപ്പടിയിൽ ഇന്നലെ ഉച്ചയോടെ ആണ് സംഭവം. വീടിനു സമീപത്ത് പുല്ല് വെട്ടുന്നതിനിടെ സന്തോഷിന്റെ കാലിൽ ചുറ്റിയ മലമ്പാമ്പ് വരിഞ്ഞുമുറുക്കുകയായിരുന്നു. ഏറെ നേരത്തെ പരിശ്രമത്തിനൊടുവിലാണ് മലമ്പാമ്പിനെ കാലില് നിന്നും നീക്കാനായത്.
ആക്രമണത്തില് സന്തോഷിന്റെ കാൽമുട്ടിനു താഴെയുള്ള എല്ലുകൾ ഒടിഞ്ഞു. മസിലുകൾക്കും ഗുരുതരമായി പരിക്കേറ്റു. പരിക്കേറ്റ സന്തോഷിനെ നാട്ടുകാര് ആണ് ആശുപത്രിയിലെത്തിച്ചത്. എറണാകുളം ലിസി ആശുപത്രിയിൽ സന്തോഷിനെ ശസ്ത്രക്രിയക്ക് വിധേയമാക്കി. ഏറെ നേരം മലമ്പാമ്പ് കാലില് വരിഞ്ഞുമുറുക്കിയിരുന്നെങ്കില് വലിയ അപകടം സംഭവിക്കുമായിരുന്നു. തലനാരിഴയ്ക്കാണ് സന്തോഷിന് ജീവൻ തിരിച്ചു കിട്ടിയത്.