മംഗലൂരു. കര്ണാടക സുള്ള്യയിലെ യുവമോര്ച്ച നേതാവ് പ്രവീണ് നെട്ടാരെയുടെ കൊലപാതകവുമായി ബന്ധപെട്ടു രണ്ട് പോപ്പുലര് ഫ്രണ്ട് പ്രവര്ത്തകര് അറസ്റ്റിലായി. സുള്ള്യ സ്വദേശികളായ ഷാക്കിര്, മുഹമ്മദ് ഷെരീഫ് എന്നിവരാണ് അറസ്റ്റിലായി രിക്കുന്നത്. കേരള അതിര്ത്തിയായ വെള്ളാരയില് നിന്നാണ് ഇവരെ പൊലീസ് പിടികൂടുന്നത്.
പ്രതികള് കേരളത്തിലേക്ക് കടന്ന വിവരം ലഭിച്ചതിന്റെ അടിസ്ഥാനത്തില് അന്വേഷണം സംഘം കേരളത്തിലേക്ക് തിരിച്ചിരുന്നു. പ്രതികള് സഞ്ചരിച്ചെന്ന കരുതുന്ന ബൈക്ക് പൊലീസ് കസ്റ്റഡിയില് എടുത്തിട്ടുണ്ട്.
പ്രവീണ് നെട്ടാരെയുടെ കൊലപാതകത്തിന് പിന്നാലെയുണ്ടായ സംഘര്ഷങ്ങളുടെ പശ്ചാത്തലത്തില് ദക്ഷിണ കന്നഡയില് അതീവജാഗ്രത തുടരുകയാണ്. സുള്ള്യ, പുത്തൂര്, കഡബ താലൂക്കുകളില് നിരോധനാജ്ഞ പ്രഖ്യാപിച്ചു. സുള്ള്യയില് യുവമോര്ച്ച വ്യാഴാഴ്ചയും ബന്ദിന് ആഹ്വാനം ചെയ്തിട്ടുണ്ട്. പ്രതിഷേധ സാധ്യത കണക്കിലെടുത്ത് പ്രദേശത്ത് കൂടുതല് പൊലീസിനെ വിന്യസിച്ചിട്ടുണ്ട്.
ഇക്കഴിഞ്ഞ ചൊവ്വാഴ്ച വൈകീട്ടാണ് ബിജെപി യുവമോര്ച്ച പ്രവര്ത്തകനായ പ്രവീണ് ദക്ഷിണ കന്നഡ ജില്ലയിലെ ബെല്ലാരെയില് വെച്ച് കൊലചെയ്യപ്പെടുന്നത്. കട അടച്ച് വീട്ടിലേക്ക് മടങ്ങുന്നതിനിടെ ബൈക്കിലെത്തിയ അക്രമി സംഘം പ്രവീണിനെ വെട്ടിക്കൊലപ്പെടുത്തുക യായിരുന്നു. പോപ്പുലര് ഫ്രണ്ട്, എസ്ഡിപിഐ പ്രവര്ത്തകരാണ് കൊലപാതകത്തിന് പിന്നിലെന്നാണ് പോലീസ് സംശയിക്കുന്നത്.