മലയാളികളുടെ പ്രിയപ്പെട്ട നടിയാണ് കുളപ്പുള്ളി ലീല. ഇപ്പോള്‍ തമിഴ് ചിത്രങ്ങളിലും തിളങ്ങുകയാണ് താരം. വിശാല്‍ ചിത്രമായ മരുതിലൂടെ തമിഴില്‍ അരങ്ങേറ്റം കുറിച്ച കുളപ്പുള്ളി ലീല രജനികാന്ത് ചിത്രമായ അണ്ണാത്തെയിലും മികച്ച പ്രകടനമാണ് കാഴ്ചവെച്ചത്. ഇപ്പോള്‍ അണ്ണാത്തെയില്‍ അഭിനയിച്ച സന്തോഷം പങ്കുവെയ്ക്കവെ തന്റെ ആദ്യ ചിത്രത്തെ കുറിച്ച് വാചാലയിയിരിക്കുകയാണ് ലീല.
കമല്‍ സംവിധാനം ചെയ്ത അയാള്‍ കഥ എഴുതുകയാണ് എന്ന ചിത്രത്തില്‍ മോഹന്‍ലാല്‍ നന്ദിനി എന്നിവര്‍ക്കൊപ്പമായിരുന്നു കുളപ്പുള്ളി ലീല തുടക്കം കുറിച്ചത്. നാടക വേദിയില്‍ നിന്നുമാണ് സംവിധായകന്‍ തന്നെ കണ്ടെത്തിയതെന്ന് ലീല പറയുന്നു. ഓഫീസില്‍ നിന്നും വരുന്ന തഹസില്‍ദാറിന്റെ ജീപ്പിന് വേണ്ടി ഓടി വന്ന് ഗേറ്റ് തുറക്കുന്നതിയാരുന്നുവത്രെ ആദ്യത്തെ ഷോട്ട്. ഒറ്റ ടേക്കിന് തന്നെ ഓകെയായി. എല്ലാവരും കൈയ്യടിച്ചപ്പോഴും നന്നായില്ല എന്ന് തന്നെയായിരുന്നു കരുതിയത് എന്ന് ലീല പറയുന്നു.
ചിത്രത്തില്‍ മോഹന്‍ലാലിനെ ചൂല് കൊണ്ട് തല്ലിയ രംഗത്തെ കുറിച്ചും കുളപ്പുള്ളി ലീല പറഞ്ഞു. അങ്ങനെ ഒരു രംഗം ചെയ്യാന്‍ ആവശ്യപ്പെട്ടപ്പോള്‍ തന്നെ, സാറെ അത് ബുദ്ധിമുട്ടാവും എന്ന് നടി പറഞ്ഞിരുന്നുവത്രെ. അത് കേട്ടു കൊണ്ട് വന്ന മോഹന്‍ലാല്‍ ചോദിച്ചു, എന്താ പ്രശ്നം. ചൂല് കൊണ്ട് തല്ലുന്ന രംഗം ബുദ്ധിമുട്ടാണ് എന്ന് പറയുന്നു എന്ന് അദ്ദേഹത്തോട് പറഞ്ഞപ്പോള്‍, ‘എന്തിനാ മടിയ്ക്കുന്നത്. കേരളത്തില്‍ നിന്നല്ല, ഇന്ത്യയില്‍ ഒരാളും എന്നെ ഇതുവരെ ചൂല് കൊണ്ട് അടിച്ചിട്ടില്ല. ആ ക്രഡിറ്റ് ചേച്ചിയ്ക്ക് ഇരിക്കട്ടെ’ എന്ന് ലാല്‍ സര്‍ പറഞ്ഞു
പുതിയ ചൂല് ഒക്കെയാണ് എന്നാലും തല്ലാന്‍ എനിക്ക് മനസ്സ് വന്നില്ല. റിഹേഴ്സലിന്റെ സമയത്ത് ഒന്നും ഞാന്‍ ചൂല് കൊണ്ട് തൊട്ടില്ല. എന്താ ചേച്ചീ തല്ലാത്തത് എന്ന് ലാല്‍ സര്‍ ചോദിച്ചു. ചേച്ചി ഒരു ആര്‍ട്ടിസ്റ്റ് അല്ലേ, ഇനി തല്ലിയില്ലെങ്കില്‍ എനിക്ക് ദേഷ്യം വരും കേട്ടോ എന്ന് പറഞ്ഞു. ആ രംഗത്ത് സൂക്ഷിച്ചു നോക്കിയാല്‍ കാണാം, എനിക്ക് തല്ലാന്‍ വേണ്ടി അല്പം തോള് ചരിച്ചു തരികയാണ് അദ്ദേഹം. ഒരുപാട് ഓടി ചുറ്റി വന്ന് തല്ലുന്നായിരുന്നു രംഗം. ഒറ്റ ടേക്കില്‍ ഓകെ ആയി. പക്ഷെ അത് കഴിഞ്ഞപ്പോഴേക്കും ഞാന്‍ തലകറങ്ങി വീണു. കണ്ണില്‍ ചൂലിന്റെ കണ്ണിയൊക്കെ പോയിരുന്നു- കുളപ്പുള്ളി ലീല പറഞ്ഞു.
