കൊച്ചി. നടന്‍ ദിലീപും കൂട്ടുപ്രതിയും സുഹൃത്തുമായ ശരത്തും എറണാകുളം സെഷന്‍സ് കോടതിയില്‍ ഹാജരായി. തെളിവ് നശിപ്പിക്കല്‍ കുറ്റം ചുമത്തിയ സാഹചര്യത്തിലാണ് ദിലീപിനെയും ശരത്തിനെയും കുറ്റപത്രം വായിച്ച് കേള്‍പ്പിക്കുന്നതിനാണ് ഹാജരാകാന്‍ കോടതി ആവശ്യപ്പെട്ടത്. തുടരന്വേഷണവുമായി ബന്ധപ്പെട്ട് തെളിവ് നശിപ്പിക്കല്‍ ദിലീപിനെതിരെ നിലനില്‍ക്കുമെന്ന് കോടതി ചൂണ്ടിക്കാട്ടി.
തെളിവ് മറച്ച് വെച്ചുവെന്നാണ് ശരത്തിനെതിരെയുള്ള കേസ്. കുറ്റപത്രം വായിച്ച് കേള്‍പ്പിച്ച ശേഷം ബന്ധപ്പെട്ട വകുപ്പുകള്‍ പ്രതികള്‍ക്കെതിരെ ചുമത്തും. കേസില്‍ നവംബര്‍ 10 ഓടെ വിചാരണ ആരംഭിക്കും. അഡീഷണല്‍ കുറ്റ പത്രമാണ് അന്വേഷണ സംഘം സമര്‍പ്പിച്ചത്. ഇതിനെ പ്രതികള്‍ ചോദ്യം ചെയ്തുവെങ്കിലും കോടതി തള്ളി. അന്വേഷണ ഉദ്യോഗസ്ഥനെ വധിക്കുവാന്‍ ഗൂഢാലോചന നടത്തി എന്ന മറ്റൊരു കേസും നിലവിലുണ്ട്. എന്നാല്‍ ഈ കേസ് തിങ്കളാഴ്ച കോടതി പരിഗണിച്ചില്ല.
ബാലചന്ദ്രകുമാറിന്റെ വെളിപ്പടുത്തലിന്റെ പശ്ചാത്തലത്തിലാണ് കേസില്‍ തുടരന്വേഷണം ആരംഭിച്ചത്. ബാലചന്ദ്ര കുമാറിന്റെ മൊഴി പ്രകാരം ശരത്താണ് നടിയെ ആക്രമിച്ച ദൃശ്യങ്ങള്‍ കൊണ്ടുവരുന്നത്. ദൃശ്യങ്ങള്‍ അവര്‍ കൊണ്ടുവന്ന മൊഴിയും അന്വേഷണ സംഘം സ്ഥിരീകരിക്കുന്നുണ്ട്. കേസിലെ ഏട്ടാം പ്രതിയാണ് ദിലീപ്.
