ഓം ശാന്തി ഓശാന എന്ന ഒറ്റ ചിത്രത്തിലൂടെ മലയാളസിനിമയിൽ പ്രശസ്തനായ നവ സംവിധായകനാണ് ജൂഡ് ആന്തണി ജോസഫ്. ഇൻഫോസിസിൽ സോഫ്റ്റ്‌വെയർ എഞ്ചിനിയറായി ജൂഡ് കുറച്ച് കാലം ജോലി ചെയ്തിട്ടുണ്ട്. നടൻ നിവിൻ പോളിയുമായി അടുത്ത സൗഹൃദം താര്തതിനുണ്ട്. 2015 ഫെബ്രുവരി 14ന് ഡയാന ആൻ ജെയിംസിനെ വിവാഹം കഴിച്ചു. ഇപ്പോളിതാ ജൂഡിന്റെ പുതിയ പോസ്റ്റാണ് വൈറലായി മാറുന്നത്.
കോവിഡ് മൂലം തൊഴിലും വരുമാനവും നഷ്‍ടമായവർ നിരവധിയാണ്. പിന്നാലെ ഇപ്പോഴിതാ ന്യൂനമർദത്തെത്തുടർന്നുള്ള പേമാരിയും കടൽക്ഷോഭവുമാണ് ജനങ്ങളെ വലയ്ക്കുന്നത്. ഇപ്പോഴിതാ ചലച്ചിത്ര സംവിധായകൻ ജൂഡ് ആൻറണി ജോസഫും ദുരിതമനുഭവിക്കുന്നവർക്ക് കൈത്താങ്ങായി രംഗത്തെത്തിയിരിക്കുകയാണ്.
#JoinTheCause, #CopyAndPasteIfYouCanAndAreWillingToHelp എന്നീ ഹാഷ്‍ടാഗുകളിൽ ആരംഭിച്ച ക്യാംപെയ്നിൻറെ സന്ദേശമാണ് ജൂഡ് ആൻറണിയും സ്വന്തം ഫേസ്ബുക് വാളിൽ പോസ്റ്റ് ചെയ്തിരിക്കുന്നത്. ദുരിതകാലത്ത് ഭക്ഷണത്തിന് ബുദ്ധിമുട്ട് നേരിടുന്നവർ മടിച്ചുനിൽക്കാതെ സഹായം ചോദിക്കാൻ അഭ്യർഥിച്ചുള്ളതാണ് സന്ദേശം.
‘ഈ പോസ്റ്റ് വായിക്കുന്ന ആരെങ്കിലും ജോലിക്കു പോകാൻ പറ്റാത്തവരോ വരുമാനം ഇല്ലാത്തവരോ ഭക്ഷണത്തിന് ബുദ്ധിമുട്ടുന്നവരോ ആണെങ്കിൽ മടിക്കേണ്ട, പ്രൈവറ്റ് മെസേജായി നിങ്ങളുടെ വിലാസം മാത്രം അയച്ചാൽ മതി. ഭക്ഷണ കിറ്റ് വീട്ടിലെത്തിയിരിക്കും. ഈ നന്മയിൽ എല്ലാവർക്കും പങ്കാളികളാകാം. ഈ മെസേജ് നിങ്ങളുടെ പ്രൊഫൈലിൽ പോസ്റ്റ് ചെയ്യൂ. നിങ്ങൾക്ക് വരുന്ന പ്രൈവറ്റ് മെസേജുകൾക്കു നിങ്ങളെക്കൊണ്ട് ആകുന്ന രീതിയിൽ സഹായിക്കൂ’, എന്നാണ് ക്യാംപെയ്നിൻറെ ഭാഗമായുള്ള സന്ദേശം. വലിയ പ്രതികരണമാണ് ഫേസ്ബുകിൽ ഈ ക്യാംപെയ്നിന് ലഭിക്കുന്നത്.
