നടി അമല പോളുമായുള്ള ചിത്രങ്ങള്‍ പ്രചരിപ്പിക്കുന്നതില്‍ നിന്നും മുന്‍ കാമുകന്‍ ഗായകന്‍ ഭവനീന്ദര്‍ സിംഗിന് മദ്രാസ് ഹൈക്കോടതിയുടെ വിലക്ക്. ഇരുവരും നേരത്തെ സുഹൃത്തുക്കള്‍ ആയിരുന്നു. കഴിഞ്ഞ മാര്‍ച്ചില്‍ ഇരുവരും ചേര്‍ന്ന് പകര്‍ത്തിയ ചില ചിത്രങ്ങള്‍ ഭവനീന്ദര്‍ സിംഗ് പുറത്തു വിട്ടിരുന്നു. ഇതോടെ ഇരുവരും വിവാഹിതരായെന്ന പ്രചരണവും ഉണ്ടായി. എന്നാല്‍ ഇതിനെതിരെ അമല പോള്‍ തന്നെ രംഗത്ത് എത്തി. തന്നെ അപകീര്‍ത്തി പെടുത്താനായാണ് ചിത്രങ്ങള്‍ പുറത്തു വിട്ടതെന്ന് അമല പോള്‍ നല്‍കിയ ഹര്‍ജിയില്‍ പറഞ്ഞു.
അമലയ്‌ക്കൊപ്പം പരമ്പരാഗത വസ്ത്രങ്ങള്‍ ധരിച്ചുള്ള ചിത്രങ്ങള്‍ ഭവനീന്ദര്‍ തന്റെ ഇന്‍സ്റ്റാഗ്രാമില്‍ പങ്കുവച്ചിരുന്നു. ഇതോടെ ഇരുവരും തമ്മില്‍ വിവാഹിതരായി എന്ന തരത്തില്‍ പ്രചരണങ്ങള്‍ ഉണ്ടായി.ഇതോടെ ഭവനീന്ദര്‍ ചിത്രങ്ങള്‍ നീക്കം ചെയ്തുവെങ്കിലും ചിത്രങ്ങള്‍ വൈറലായി.
ചിത്രം ഫോട്ടോഷൂട്ടിന്റെ ഭാഗമായി എടുത്തതാണെന്നും ഭവനീന്ദര്‍ ഇത് ദുരുപയോഗം ചെയ്യുന്നുവെന്നും കാണിച്ച് അമല കോടതിയെ സമീപിക്കുകയായിരുന്നു. ഇരുവരും ഒന്നിച്ചുനില്‍ക്കുന്ന ഒരു ഫോട്ടോ പോലും ഇനി ഭവനീന്ദര്‍ പ്രസിദ്ധീകരിക്കരുതെന്നും ഹര്‍ജിയില്‍ അമല ആവശ്യപ്പെട്ടു. അമലയുടെ ആവശ്യം അംഗീകരിച്ച കോടതി നടിക്ക് അനുകൂല ഉത്തരവ് പുറപ്പെടുവിക്കുകയായിരുന്നു.
