ലണ്ടൻ. ബ്രിട്ടന്റെ പ്രധാനമന്ത്രി പദത്തിലേക്ക് ഋഷി സുനക് എത്തിയതിൽ ഇന്ത്യക്കും ഇത് അഭിമാനത്തിന്റെ മുഹൂർത്തം. ഇന്ത്യയേയും ഇന്ത്യയുടെ പാരമ്പര്യത്തെയും എപ്പോഴും മുറുകെ പിടിക്കുന്ന ഋഷി സുനക് എന്ന ഇന്ത്യൻ വംശജൻ ബ്രിട്ടന്റെ ഏറ്റവും ഉയർന്ന പദവിയിൽ എത്തുന്നത് ഇത് ആദ്യം. പഞ്ചാബിൽ ജനിച്ച് ആദ്യം കിഴക്കൻ ആഫ്രിക്കയിലേക്കും പിന്നീട് 1960കളിൽ ബ്രിട്ടനിലേക്കും കുടിയേറിയതാണ് ഋഷിയുടെ പൂർവികർ. ബ്രിട്ടനിൽ ജനിച്ച യശ്‌വീർ സുനകിന്റെയും ഉഷയുടെയും മൂത്തമകനാണ് ഋഷി സുനക്. 1980 മേയ് 12നു ഹാംഷറിലെ സതാംപ്ടണിലാണ് ഋഷി സുനക് ജനിക്കുന്നത്. ഇൻഫോസിസ് സ്ഥാപകൻ നാരായണ മൂർത്തിയുടെ മകൾ അക്ഷത മൂർത്തിയാണ് ഋഷിയുടെ ഭാര്യ.
യോക്‌ഷൈറിൽനിന്നുള്ള എംപിയായ ഋഷി തിങ്കളാഴ്ച ഭഗവത്ഗീത തൊട്ടാണ് പാർലമെന്റിൽ സത്യപ്രതിജ്ഞ ചെയ്തത് എന്നത് ലോക ശ്രദ്ധ നേടുകയാണ്. ഇത്തരത്തിൽ സത്യപ്രതിജ്ഞ ചെയ്യുന്ന ആദ്യ പാർലമെന്റേറിയൻ എന്ന പെരുമയും അങ്ങനെ ഋഷിക്ക് സ്വന്തമായി. മനസിന് സമ്മർദം നിറയുന്ന അവസരങ്ങളിൽ ഭഗവത്ഗീത ഇപ്പോഴും തനിക്ക് രക്ഷക്കായി എത്താറുണ്ടെന്നും തന്റെ കർത്തവ്യത്തെക്കുറിച്ച് ഓർമിപ്പിക്കാറുണ്ടെന്നും ഋഷി പറഞ്ഞിട്ടുണ്ട്.
തന്റെ പൈതൃകത്തെയും പൈതൃക സംസ്കാരത്തെയും അതിന്റെ മൂല്യങ്ങളെയും കുറിച്ച് കുടുംബം എപ്പോഴും ഓർമിപ്പിക്കാറു ണ്ടെന്നും ഋഷി പറയാറുണ്ട്. ഇന്ത്യയിൽ ഇടയ്ക്ക് സന്ദർശനം നടത്താറുള്ള ഋഷി, ഭാര്യ അക്ഷിതയുമായി ബെംഗളൂരുവിലെത്തി ബന്ധുക്കളെ കാണാറുണ്ട്.
ഋഷിക്ക് 700 മില്യൻ പൗണ്ടിന്റെ ആസ്തി ഉണ്ടെന്നാണ് കണക്കുകൾ സൂചന നൽകുന്നത്. യോക്‌ഷെയറിലെ വലിയ മാളികയ്ക്കു പുറമേ റിഷിയും ഭാര്യക്കും സെൻട്രൽ ലണ്ടനിലെ കെൻസിങ്ടണിലും വസ്തുവകകളുണ്ട്. ഇന്ത്യക്കാർക്ക് ഏറെ പ്രിയപ്പെട്ട ക്രിക്കറ്റ് കളി ഋഷിക്കെന്നും പ്രിയപ്പെട്ടതാണ്.
