തിരുവനന്തപുരം. ജയിലുകളിലെ സ്വകര്യങ്ങള്‍ പഠിക്കുന്നതിനായി ജയില്‍ ഡിജിപി സുദേഷ് കുമാര്‍ അമേരിക്കയിലേക്കും കാനഡയിലേക്കും നടത്താനിരുന്ന യാത്ര റദ്ദാക്കി. 1987 ബാ്ച് ഐപിഎസ് ഉദ്യോഗസ്ഥനായ സുദേഷ് ഈ മാസം അവസാനം സര്‍വ്വീസില്‍ നിന്ന് വിരമിക്കുകയാണ്. വെല്ലൂരിലെ അക്കാദമി ഓഫ് പ്രിസന്‍സ് അന്‍ഡ് കറക്ഷനല്‍ അഡ്മിനിസ്‌ട്രേഷന്റെ നേതൃത്വത്തിലാണ് യാത്ര ആസൂത്രണം ചെയ്തിരുന്നത്.
യാത്ര അടുത്തവര്‍ഷത്തേക്ക് മാറ്റുവാന്‍ വിദേശകാര്യ മന്ത്രാലയം അക്കാദമിയോട് നിര്‍ദേശിച്ചു. ഇതിന്റെ കാരണം വ്യക്തമല്ല. യാത്ര മാറ്റിയതിനെ തുടര്‍ന്ന് മുമ്പ് ഇറക്കിയ ഉത്തരവ് റദ്ദാക്കി പൊതുഭരണ വകുപ്പ് പുതിയ ഉത്തരവിറക്കി. വിരമിക്കുന്ന ഉദ്യോഗസ്ഥനെ വിദേശത്തേക്ക് അയക്കുന്നതിതിനെതിരെ വിമര്‍ശനം ഉയര്‍ന്നിരുന്നു. സുദേഷിനെതിരെ ജ്വല്ലറിയില്‍ നിന്നും 95 ശതമാനം ഡിസ്‌കൗണ്ടില്‍ സ്വര്‍ണം വാങ്ങിയതായി പരാതി ലഭിച്ചിരുന്നു. വിദേശ യാത്രകള്‍ സംബന്ധിച്ചും പരാതി ലഭിച്ചിട്ടുണ്ട്.
