മിനിസ്‌ക്രീനിലും ബിഗ് സ്‌ക്രീനിലും ഒരുപോലെ തിളങ്ങി നിൽക്കുന്ന നടിയാണ് ബീന ആന്റണി. ബീനയുടെ ഭർത്താവ് മനോജിന്റെയും മകൻ ആരോമലിന്റെയും വിശേഷങ്ങൾ അറിയാൻ പ്രേക്ഷകർക്ക് താത്പര്യമാണ്. അടുത്തിടെ കുടുംബത്തിൽ ചില പ്രതിസന്ധികൾ ഉണ്ടായ ഘട്ടത്തിൽ ഒപ്പം നിന്ന തങ്ങളുടെ പ്രിയ ആരാധകർക്ക് നന്ദിയും കുടുംബം അറിയിച്ചിരുന്നു. ഇപ്പോൾ മൗനരാഗം സീരിയലിൽ തിളങ്ങുകയാണ് ബീന.
ഷൂട്ടിങിനും മറ്റ് തിരക്കുകൾക്കുമിടയിൽ കഴിഞ്ഞ ദിവസമാണ് ബീന ആന്റണി ശാരീരികമായ അവശതകൾ മൂലം ആശുപത്രിയിൽ പ്രവേശിപ്പിച്ചത്. ചുമയുടെ രൂപത്തിലാണ് അസ്വസ്ഥതകൾ തുടങ്ങിയതെന്നും അതിന് ഗൗരവം കൊടുക്കാതെ മുന്നോട്ട് പോയതിനാൽ ചുമ ന്യുമോണിയയായി മാറിയെന്നുമാണ് ബീന ആന്റണി കഴിഞ്ഞ ദിവസം പങ്കുവെച്ച വീഡിയോയിൽ പറഞ്ഞത്.
എക്‌സ് റേ റിസൽട്ട് ബെറ്ററായതിന്റെ സന്തോഷത്തിലാണ്. ചരിത്രത്തിലാദ്യമായിട്ടായിരിക്കും ന്യൂമോണിയ പേഷ്യന്റ് ഹോസ്പിറ്റൽ ബെഡിൽ നിന്നും റീൽ ഇടുന്നത്. അങ്ങനെയും വേണമല്ലോ, സ്ട്രയ്ൻ ഒന്നും എടുത്തില്ലട്ടോ. ഇവിടെ ബോറടിക്കുന്നുണ്ട്. ഒരു ആശ്വാസത്തിന് വേണ്ടി ചെയ്തതാണെന്നായിരുന്നു പുതിയ റീൽസ് വീഡിയോയ്ക്ക് ബീന നൽകിയ ക്യാപ്ഷൻ.
ചില ലക്ഷണങ്ങളുണ്ടായിരുന്നുവെങ്കിലും താൻ അത് അത്ര കാര്യമാക്കിയിരുന്നില്ല. അതാണ് വീണ്ടും പണിയായത്. ചുമയോ, പനിയോ അങ്ങനെയെന്തെങ്കിലും ലക്ഷണങ്ങളുണ്ടെങ്കിൽ അവഗണിക്കരുത്. സ്വന്തം അനുഭവത്തിലൂടെയാണ് താൻ ഇത് പറയുന്നതെന്നും താരം വ്യക്തമാക്കിയിരുന്നു. ആശുപത്രിയിലെ ആദ്യ വീഡിയോ കണ്ടപ്പോൾ ന്യൂമോണിയ ആണോ എന്ന് ചിലരൊക്കെ ചോദിച്ചിരുന്നു. സ്‌കാനിംഗിന് ശേഷമാണ് അസുഖം സ്ഥിരീകരിച്ചത്. രണ്ടാമതും വില്ലനെത്തിയപ്പോൾ ശരിക്കും പേടിച്ചുവെന്നും താരം കുറിച്ചിരുന്നു.
കൊവിഡിനൊപ്പമായി ന്യൂമോണിയ ബാധിച്ചതിനെക്കുറിച്ച് മുൻപ് ബീന ആന്റണി സംസാരിച്ചിരുന്നു. മരണത്തെ നേരിൽ കണ്ട അവസ്ഥയായിരുന്നു. ഷൂട്ടിംഗിനിടയിലായിരുന്നു കൊവിഡ് ബാധിച്ചത്. പനി വിടാതെ തുടർന്നപ്പോഴും ഡോക്ടറെ കണ്ടിരുന്നില്ല. വീട്ടിൽ വിശ്രമത്തിൽ കഴിയുകയായിരുന്നു. കുറേ ദിവസമായിട്ടും പനി മാറാതെയിരുന്നപ്പോഴും ആശുപത്രിയിൽ പോവാൻ മടിയായിരുന്നു. ശ്വാസം കിട്ടാത്ത അവസ്ഥ വന്നപ്പോൾ ശരിക്കും ഭയം തോന്നിയിരുന്നു.
ഓക്‌സിജൻ മാസ്‌ക്കില്ലാതെ ശ്വസിക്കാൻ പറ്റാത്ത അവസ്ഥയായിരുന്നു. ന്യൂമോണിയയും കൂടുതലായിരുന്നു. അന്ന് അതേക്കുറിച്ച് ആരും തന്നോട് പറഞ്ഞിരുന്നില്ല. ഡിസ്ചാർജായി വീട്ടിലെത്തിയ ശേഷമാണ് മനുവും മോനും അതേക്കുറിച്ച് പറഞ്ഞത് തന്നതെന്നും ബീന പറഞ്ഞിരുന്നു. അന്നത്തെ വീഡിയോ സോഷ്യൽമീഡിയയിലൂടെ വളരെ പെട്ടെന്ന് വൈറലായിരുന്നു.
