കൊച്ചി : കരുവന്നൂര് ബാങ്ക് ആവശ്യപ്പെട്ടാല് വായ്പയെടുത്തവരുടെ ആധാരങ്ങള് തിരികെ നല്കാമെന്ന് ഇ.ഡി. അതേസമയം ജയരാജന് പി, മുകുന്ദന് എന്നിവരുടെ ബാങ്ക് അക്കൗണ്ടുകള് വഴി പണം കൈമാറ്റം ചെയ്തിട്ടുണ്ടെന്ന് ഇ.ഡി. പ്രത്യേക കോടതിയില് നല്കിയ റിപ്പോര്ട്ടില് വ്യക്തമാക്കുന്നു. കരുവന്നൂരിലെ ബാങ്ക് തട്ടിപ്പ് കേസിലെ മുഖ്യപ്രതിയായ പി. സതീഷ് കുമാര് പണം കൈമാറ്റം ചെയ്യുന്നതിനായി രണ്ട് അക്കൗണ്ടുകള് കൂടി ഉപയോഗിച്ചിട്ടുണ്ടെന്നാണ് ഇ.ഡി.യുടെ കണ്ടെത്തല്.
ജയരാജന് പി., മുകുന്ദന് എന്നിവരുടെ ബാങ്ക് അക്കൗണ്ടുകളില് പണം എത്തിയിട്ടുണ്ട്. എന്നാല് ഇത് ആരൊക്കെയാണെന്ന് ഇ.ഡി. കോടതിയില് നല്കിയ റിപ്പോര്ട്ടില് വ്യക്തമാക്കിയിട്ടില്ല. മുകുന്ദന് മുഖ്യപ്രതി സതീഷിന്റെ അടുത്ത ബന്ധുവാണ്. ജയരാജന് വിദേശത്തുള്ള ആളാണെന്നും സൂചനയുണ്ട്.
അതേസമയം ബാങ്ക് ആവശ്യപ്പെട്ടാല് വായ്പയെടുത്തവരുടെ ആധാരങ്ങള് തിരികെ നല്കാമെന്നും ഇ.ഡി. ഹൈക്കോടതിയില് വ്യക്തമാക്കി. വായ്പ തിരികെ അടച്ചിട്ടും ആധാരം തിരികെ കിട്ടുന്നില്ലെന്ന് ആരോപിച്ച് തൃശ്ശൂര് സ്വദേശി ഫ്രാന്സിസ് നല്കിയ പരാതിയിലാണ് ഇ.ഡി.യുടെ മറുപടി.