കൊച്ചി. രണ്ട് സ്ത്രീകളെ തട്ടിക്കൊണ്ടുപോയി കൊന്നു കഷ്ണങ്ങളാക്കി പത്തനംതിട്ടയ്ക്ക് സമീപം ഇലന്തൂരില്‍ കുഴിച്ചിട്ടത് ദുര്‍മന്ത്രവാദത്തിന്റെ ഭാഗമായിട്ടാണെന്ന് പോലീസ് പറയുന്നു. തിരുവല്ലയിലെ ദമ്പതികള്‍ക്കായിട്ടാണ് പെരുമ്പാവൂരില്‍ നിന്നുള്ള ഏജന്റ് കാലടിയില്‍ നിന്നും കടവന്ത്രയില്‍ നിന്നും സ്ത്രീകളെ കടത്തിക്കൊണ്ട് പോയതെന്നാണ് വിവരം. കേസില് മൂന്ന് പേരെ പോലീസ് പിടികൂടി. തിരുവല്ല സ്വദേശിയായ വൈദ്യന്‍ ഭഗവല്‍ സിങ്, ഭാര്യ ലൈല, പെരുമ്പാവൂര്‍ സ്വദേശിയായ ഏജന്റ് മുഹമ്മദ് ഷാഫി എന്നിവരെയാണ് പോലീസ് അറസ്റ്റ് ചെയ്തത്.
ഐശ്വര്യത്തിനും സമ്പദ്‌സമൃദ്ധിക്കും വേണ്ടി പൂജ നടത്താന്‍ ബന്ധപ്പെടുക എന്ന പേരില്‍ പ്രതി ഷാഫി ഒരു ഫേസ്ബുക്ക് പോസ്റ്റ് ഇട്ടിരുന്നു. ഇത് കണ്ട് തിരുവല്ല സ്വദേശിയായ ഭഗവല്‍ സിങ്ങും ഭാര്യ ലൈലയും ഇയാളെ ബന്ധപ്പെട്ടു. തുടര്‍ന്ന് നരബലിയാണ് പരിഹാരം എന്ന് പറഞ്ഞ് ഇവരെ തെറ്റിദ്ധരിപ്പിക്കുകയായിരുന്നു. പിന്നീട് ഇത് പറഞ്ഞ് ഇയാള്‍ പണം കൈക്കലാക്കി. തുടര്‍ന്ന് ആറ് മാസം മുമ്പ് കാലടി സ്വദേശിയായ റോസിലിയെ തട്ടിക്കൊണ്ടുപോയി നരബലി നടത്തി. ഒരാളെ കൂടി ബലി നല്‍കണമെന്ന് പറഞ്ഞാണ് കടവന്ത്ര പൊന്നുരുന്നി സ്വദേശിനിയായ പത്മത്തെ സെപ്റ്റംബര്‍ 26ന് കടത്തിക്കൊണ്ടുപോയത്.
കടവന്ത്രയില്‍ നിന്നും പത്മത്തെ കാണാനില്ലെന്ന് പരാതിയുടെ അടിസ്ഥാനത്തില്‍ നടത്തിയ അന്വേഷണത്തിലാണ് ദുര്‍മന്ത്രവാദവും നരബലിയും സംബന്ധിച്ച വിവരങ്ങള്‍ പുറത്ത് വന്നത്. കൊല്ലപ്പെട്ട രണ്ട് സ്ത്രീകളും ലോട്ടറി വില്‍പ്പനക്കാരാണ്. അതിക്രൂരമായ രീതിയില്‍ തലയറുത്താണ് സ്ത്രീകളെ കൊലപ്പെടുത്തിയതെന്നാണ് നിഗമനം. പത്തനംതിട്ട ഇലന്തൂരിലെ വീടിന് സമീപത്താണ് മൃതദേഹങ്ങള്‍ കുഴിച്ചിട്ടത്.
