കൊച്ചി : മുഖ്യമന്ത്രിക്ക് തന്നെ ശാസിക്കാനുള്ള അധികാരമുണ്ടെന്നും അദ്ദേഹം എന്ത് പറഞ്ഞാലും പ്രതികരിക്കില്ലെന്നും കിറ്റക്സ് ഗ്രൂപ്പ് ചെയര്മാന് സാബു ജേക്കബ്. ഇനി ഒരിക്കലും ഒരു രൂപ പോലും കേരളത്തില് മുടക്കില്ലെന്നും അദ്ദേഹം പറഞ്ഞു. എറണാകുളത്തെ എംഎല്എമാര്ക്കെതിരേ രൂക്ഷ വിമര്ശനം ഉയര്ത്തിക്കൊണ്ടായിരുന്നു സാബു ജേക്കബിന്റെ പ്രതികരണം.
രാജകീയ സ്വീകരണമാണ് തനിക്ക് തെലങ്കാനയില് ലഭിച്ചത്. ആദ്യഘട്ടത്തില് ആയിരം കോടിരൂപയുടെ നിക്ഷേപമാണ് ഉദ്ദേശിക്കുന്നത്. അതിന് വേണ്ടിയുള്ള ഉറപ്പ് കൊടുത്തിട്ടുണ്ട്. രണ്ടാഴ്ചക്കുള്ളില് ബാക്കി കാര്യങ്ങള് തീര്പ്പാക്കുമെന്നും അദ്ദേഹം പറഞ്ഞു. ഇതിന് ശേഷമാണ് കൂടുതല് നിക്ഷേപം വേണമോ എന്നതടക്കമുള്ള കാര്യങ്ങളെക്കുറിച്ച് ആലോചിക്കുകയുള്ളൂവെന്നും അദ്ദേഹം പറഞ്ഞു. പ്രധാനമായും രണ്ട് പാര്ക്കുകളാണ് തെലങ്കാനയില് കണ്ടത്. ഒന്ന് ടെക്സറ്റൈയില്സിന് വേണ്ടി വാറങ്കലും മറ്റേത് ജനറല്പാര്ക്ക് ആണെന്നും അദ്ദേഹം പറഞ്ഞു. തെലങ്കാന നല്കിയ വാഗ്ദാനങ്ങള് കേട്ടാല് ഇവിടെയുള്ള ഒരു വ്യവസായി പോലും ബാക്കി ഉണ്ടാകില്ലെന്നും അദ്ദേഹം വ്യക്തമാക്കി.
താന് ഏറ്റവും കൂടുതല് കടപ്പെട്ടിരിക്കുന്നത് കുന്നത്തുനാട് എംഎല്എയോടാണ്. കൂടാതെ എറണാകുളം ജില്ലയില് തന്നെ ഇതിന് പിന്നില് പ്രവര്ത്തിച്ച നാല് എംഎല്എമാരും ഒരു എം പിയുമുണ്ട്. പെരുമ്പാവൂര് എം എല് എ, മൂവാറ്റുപുഴ എംഎല്എ, തൃക്കാക്കര എംഎല്എ, എറണാകുളം എംഎല്എ, ചാലക്കുടി എം പി എന്നിവരോടും കടപ്പെട്ടിരിക്കുന്നു. കാരണം വ്യവസായ സൗഹൃദം എന്താണെന്നും ഒരു വ്യവസായിക്ക് എങ്ങനെ കോടികള് സമ്പാദിക്കാമെന്നുള്ള വഴി ഇവരാണ് തുറന്ന് തന്നത്. അതുകൊണ്ട് തന്നെ ഈ അഞ്ച് എം എല് എയോടും എം പിയോടും നന്ദിയാണ് പറയാനുള്ളത്. അതേസമയം മുഖ്യമന്ത്രിയുടെ വിമര്ശനത്തിനോട് അദ്ദേഹം എന്ത് പറഞ്ഞാലും അതിനെതിരേ പ്രതികരിക്കില്ലെന്നും സാബു ജേക്കബ് പറഞ്ഞു.