കല്ലമ്പലം: പ്രായപൂര്ത്തിയാകാത്ത മക്കളെ ഉപേക്ഷിച്ച് ഒളിച്ചോടിയ യുവതിയെയും യുവാവിനെയും പോലീസ് അറസ്റ്റ് ചെയ്തു. മണമ്പൂര് പെരുങ്കുളം ബി എസ് മന്സിലില് സജിമോന് എന്ന 43കാരനും കല്ലറ പാങ്ങോട് തുമ്പോട് ഏറത്തു വീട്ടില് ഷഹന എന്ന 34കാരിയുമാണ് മക്കളെയും പങ്കാളികളെയും ഉപേക്ഷിച്ച് ഒളിച്ചോടിയത്. ഇവരെ പിന്നീട് പോലീസ് പിടികൂടുകയായിരുന്നു.
മൂന്ന് മക്കളുടെ അമ്മയാണ് ഷഹന. 12, 9,7 വയസുള്ള മക്കളെ ഉപേക്ഷിച്ചാണ് ഷഹന കഴിഞ്ഞ മാസം 13ന് കാമുകനായ സജിമോനോടൊപ്പം ഒളിച്ചോടി പോയത്. വിവാഹിതനായ സജിമോനും മൂന്ന് മക്കള് ഉണ്ട്. ഷഹനയെ കാണാനില്ലെന്ന് ബന്ധുക്കള് നല്കിയ പരാതിയില് പോലീസ് അന്വേഷണം നടത്തി വരികയായിരുന്നു.
ബാലനീതി വകുപ്പ് പ്രകാരം കേസെടുത്ത് പള്ളിക്കല് പോലീസ് നടത്തിയ അന്വേഷണത്തില് ഇരുവരും അധികം ദൂരത്തേക്ക് പോയിട്ടില്ല എന്ന് കണ്ടെത്തി. ഒടുവില് ഇരുവരെയും അഞ്ചലിലുള്ള സുഹൃത്തിന്റെ വീട്ടില് നിന്നും കണ്ടെത്തുകയും അറസ്റ്റ് ചെയ്യുകയുമായിരുന്നു. നേരത്തെയും രണ്ട് പ്രാവശ്യം ഷഹന കാമുകന്മാരോടൊപ്പം ഒളിച്ചോടിയിട്ടുണ്ട്. ആറ്റിങ്ങള് കോടതിയില് ഹാജരാക്കിയ പ്രതികളെ റിമാന്ഡ് ചെയ്തു.