കൊച്ചി. കെ സുധാകരന്‍ ഹൈക്കോടതിയില്‍ മുന്‍കൂര്‍ജാമ്യാപേക്ഷ നല്‍കി. മോന്‍സണ്‍ മാവുങ്കലുമായി ബന്ധപ്പെട്ട കേസില്‍ പ്രതിയാക്കിയതോടെയാണ് മുന്‍കൂര്‍ ജാമ്യാപേക്ഷയുമായി കെ സുധാകരന്‍ ഹൈക്കോടതിയെ സമീപിച്ചത്. ക്രൈംബ്രാഞ്ച് അന്വേഷിക്കുന്ന കേസില്‍ കെ സുധാകരന്‍ രണ്ടാം പ്രതിയാണ്. അതേസമയം താന്‍ തെറ്റ് ചെയ്തിട്ടില്ലെന്നും ആരെയും വഞ്ചിച്ചിട്ടില്ലെന്നും കെ സുധാകരന്‍ പ്രതികരിച്ചിരുന്നു.
മോന്‍സന്‍ മാവുങ്കല്‍ പ്രതിയായ കേസില്‍ കെ സുധാകരനൊപ്പം മുന്‍ ഐജി ജി ലക്ഷ്മണ്‍, മുന്‍ ഡിഐജി എസ് സുരേന്ദ്രന്‍ എന്നിവരാണ് പ്രതികള്‍. ഗള്‍ഫിലെ രാജകുടുംബത്തിന് നല്‍കിയ പുരാവസ്തുക്കളില്‍ നിന്നും ലഭിച്ച 2.62 ലക്ഷം കോടി രൂപ കേന്ദ്രസര്‍ക്കാര്‍ തടഞ്ഞ് വെച്ചിരിക്കുകയാണെന്ന് മോന്‍സന്‍ പരാതിക്കാരെ വിശ്വസിപ്പിച്ചതായി പരാതിയില്‍ പറയുന്നു.
