ലോകം മുഴുവന്‍ കൊറോണ വൈറസിന് എതിരെ പോരാടുകയാണ്. വൈറസ് വ്യാപനം തടയാനായി രാജ്യം ലോക്ക് ഡൗണിലാണ്. ഇതോടെ സിനിമ താരങ്ങളും അവരവരുടെ വീടുകളില്‍ ഒതുങ്ങുകയാണ്. പലരും സമയം ചിലവഴിക്കുന്നത് സോഷ്യല്‍ മീഡിയകളിലൂടെ ആണ്. കോവിഡിന് എതിരെയുള്ള ബോധ വത്കരണം മാത്രമല്ല തങ്ങളുടെ വിശേഷങ്ങളും താരങ്ങള്‍ പങ്കുവയ്ക്കുന്നുണ്ട്. ഇതിനിടെ ചിലര്‍ ലൈവ് വീഡിയോയിലൂടെ ആരാധകരുമായി സംവധിക്കുന്നുമുണ്ട്.
ഇപ്പോള്‍ വാര്‍ത്തയാകുന്നത് ഒരു ആരാധകന്റെ വിചിത്രമായ സംശയത്തിന് നടി ഇല്യാന ഡി ക്രൂസ് നല്‍കിയ മറുപടിയാണ്. സോഷ്യല്‍ മീഡിയയില്‍ ഈ ചോദ്യവും ഉത്തരവും വന്‍ ഹിറ്റായിരിക്കുകയാണ്. ‘ആര്‍ത്തവ സമയത്ത് പ്രതിശ്രുത വധുവിനെ എങ്ങനെ കൈകാര്യം ചെയ്യാം ആ സമയത്ത് അവളെ വേദനിപ്പിക്കാന്‍ സാധിക്കില്ല എന്നെ സഹായിക്കൂ’ എന്നായിരുന്നു ആരാധകന്റെ ചോദ്യം. ഇതിന് കിടിലന്‍ ഉപദേശമായിരുന്നു ഇല്യാനയുടെ മറുപടി.
‘ജാഗ്രതയോടെ സമീപിക്കുക. ഒന്നുകില്‍ അവള്‍ക്ക് ഒരു ഭ്രാന്തന്‍ കെട്ടിപ്പിടുത്തം നല്‍കുക അല്ലെങ്കില്‍ അവളുടെ സമീപത്ത് പോവാതിരിക്കുക. അവള്‍ കരയാന്‍ തുടങ്ങിയാല്‍, അവള്‍ക്ക് ചോക്ലേറ്റ് കൊടുക്കുക. ഓടിപ്പോവുക’ എന്നാണ് ഇല്യാനയുടെ മറുപടി. ഇന്‍സ്റ്റഗ്രാം സ്റ്റോറിയായാണ് ഇല്യാന ഇത് പങ്കുവച്ചിരിക്കുന്നത്.
നേരത്തെ കാസ്റ്റിംഗ് കൗച്ചിനെ കുറിച്ച് പ്രതികരിച്ച് ഇല്യാന രംഗത്ത് എത്തിയിരുന്നു. കാസ്റ്റിങ് കൗച്ചിനെക്കുറിച്ച് ബോളിവുഡ് നടിമാര്‍ സംസാരിക്കാന്‍ ഭയക്കുന്നതിന് ഒരുപാട് കാരണങ്ങളുണ്ട്. ബോളിവുഡിലെ മുന്‍നിര നടന്മാരില്‍ ചിലര്‍ ആ കൂട്ടത്തില്‍ ഉള്‍പ്പെട്ടിട്ടുള്ളതിനാല്‍ സിനിമാമോഹവുമായി നടക്കുന്ന പെണ്‍കുട്ടികള്‍ വായ തുറക്കില്ലെന്നും ഇല്യാന പറഞ്ഞിരുന്നു.
നടന്മാരെ ദൈവങ്ങളെപ്പോലെ ആരാധിക്കുന്ന രാജ്യമാണ് ഇന്ത്യ. ആരെങ്കിലും വായ തുറന്നാല്‍ ആരാധകര്‍ അവരെ വളഞ്ഞിട്ട് ആക്രമിക്കും. ഭീഷണിപ്പെടുത്തും. പിന്നെ കരിയറും അവസാനിക്കും. കൈയില്‍ എണ്ണാവുന്ന ബോളിവുഡ് നടികള്‍ മാത്രമേ തങ്ങള്‍ക്ക് ഉണ്ടായ കാസ്റ്റിങ് കൗച്ച് അനുഭവങ്ങള്‍ പങ്കുവച്ചിട്ടുള്ളൂ. പക്ഷേ അതില്‍ ചൂഷണം ചെയ്തവരുടെ പേരുകള്‍ വെളിപ്പെടുത്തിയവര്‍ വിരളമാണ്. ലൈംഗിക പീഡനത്തെ അതിജീവിച്ച ഒരുപാട് നടിമാരുള്ള ഒരിടമാണ് സിനിമ എന്നതില്‍ യാതൊരു സംശയവും വേണ്ട.- ഇല്യാന പറഞ്ഞിരുന്നു.
