കോഴിക്കോട്: സംസ്ഥാനത്ത് പുതിയ നിപ്പാ വൈറസ് കേസുകൾ റിപ്പോർട്ട് ചെയ്തിട്ടില്ലെന്ന് ആരോഗ്യമന്ത്രി കെ.കെ. ശൈലജ. വൈറസ് ബാധിച്ച് മരിച്ചവരുമായി അടുപ്പമുള്ളവരെ നിരീക്ഷിച്ചുവരികയാണ്. രോഗബാധിതർക്കായി സ്ഥിരം ഐസൊലേഷൻ വാർഡുകൾ സജ്ജമാക്കുമെന്നും മന്ത്രി പറഞ്ഞു.
മരിച്ചവരുടെ ബന്ധുക്കളെ അടുത്ത മാസം 10 വരെ നിരീക്ഷണം തുടരും. വൈറസിനുള്ള മരുന്ന് ഓസ്ട്രേലിയയിൽനിന്ന് ഇതുവരെ എത്തിയിട്ടില്ല. മരുന്ന് കൊണ്ടുവരാൻ ശ്രമം തുടരുകയാണെന്നും മന്ത്രി വ്യക്തമാക്കി. നിപ്പാ വൈറസ് ബാധ കണക്കിലെടുത്ത് മലപ്പുറം, കോഴിക്കോട് ജില്ലകളിൽ സ്കൂൾ തുറക്കുന്നത് ജൂണ്‍ അഞ്ചിനാക്കാനും തീരുമാനിച്ചു.
