മുംബൈ∙ പ്രശസ്ത ഗസൽ ഗായകൻ പങ്കജ് ഉദാസ് (73) അന്തരിച്ചു. ദീർഘകാലമായി അസുഖബാധിതനായിരുന്നു. പങ്കജ് ഉദാസിന്റെ മരണവിവരം മകൾ നയാബ് ഉദാസാണ് സ്ഥിരീകരിച്ചത്. ചിട്ടി ആയി ഹെ’ പോലുള്ള നിത്യഹരിതഗാനങ്ങളിലൂടെ സംഗീതാസ്വാദകരില് ചിരപ്രതിഷ്ഠ നേടിയ ഗായകനാണ് പങ്കജ് ഉദാസ്.
ഗുജറാത്തിലെ ചര്ഖ്ഡി എന്ന കൊച്ചുഗ്രാമത്തില് ജനിച്ച പങ്കജിന്റെ രക്തത്തില് അലിഞ്ഞുചേര്ന്നതായിരുന്നു പാട്ടിനോടുള്ള പ്രണയം. മൂത്ത് സഹോദരന് മന്ഹര് ഉദാസ് നേരത്തെ ബോളിവുഡില് സാന്നിധ്യമറിയിച്ചയാളാണ്. അതുകൊണ്ടു തന്നെ ചേട്ടന്റെ പാത പിന്തുടര്ന്നുവന്ന പങ്കജ് പിന്നണി ഗാനരംഗത്തേക്കാള് ഗസലുകള്ക്ക് പ്രാധാന്യം കൊടുത്തു. ചാന്ദി ജൈസ രംഗ് ഹൈ തേരാ സോനേ ജൈസെ ബാല് എന്ന ഗാനത്തോടെയാണ് പങ്കജിനെ ഗസല് ലോകം ശ്രദ്ധിച്ചുതുടങ്ങുന്നത്.
ഗസല് ജീവിതവഴിയായി തിരഞ്ഞെടുത്ത പങ്കജ് ആദ്യം ചെയ്തത് ഉറുദു പഠിക്കുകയാണ്. പിന്നീട് കാനഡയിലേയ്ക്ക് പറന്നു. പത്ത് മാസം കാനഡയിലും യു. എസിലും ഗസലുമായി അലഞ്ഞശേഷമാണ് പിന്നീട് ഇന്ത്യയിലേയ്ക്ക് തിരിച്ചുവരുന്നത്. 1980ല് ആഹത് എന്ന ആദ്യ ഗസല് ആല്ബത്തോടെയാണ് പങ്കജ് തന്റെ വരവ് അറിയിച്ചത്. പിന്നീട് ഒരു തിരിഞ്ഞുനോട്ടമുണ്ടായില്ല പങ്കജ് ഉദാസിന്. സൈഗളിനും ജഗജിത്ത് സിങ്ങിനും തലത്ത് മുഹമ്മദിനുമെല്ലാം ഒപ്പം സമാനതകളില്ലാത്ത ആലാപനശൈലി ഇന്ത്യന് ഗസലിന്റെ മുഖം തന്നെയായി മാറി പങ്കജ്.
ചുപ്കെ ചുപ്കെ, യുന് മേരെ ഖാത്ക, സായ ബാങ്കര്, ആഷിഖോന് നെ, ഖുതാരത്, തുജ രാഹ ഹൈ തൊ, ചു ഗയി, മൈഖാനെ സെ, ഏക് തരഫ് ഉസ്ക ഗര്, ക്യാ മുജ്സെ ദോസ്തി കരോഗെ, മൈഖാനെ സേ, ഗൂന്ഗാത്, പീനെ വാലോ സുനോ, റിഷ്തെ ടൂതെ, ആന്സു തുടങ്ങിയ ഇന്നും ഗസല്പ്രേമികള്ക്ക് ഒരു ഗാനമെന്നതിലേറെ ഒരു വികാരമാണ്.