മധുര : ഈ കോവിഡ് കാലത്ത് എല്ലാവര്‍ക്കും അവരുടെ പ്രിയപ്പെട്ടവരുടെ കല്യാണത്തിന് പോകാനോ, അവര്‍ക്കുള്ള സമ്മാനങ്ങള്‍ നല്‍കാനോ പറ്റിയെന്നു വരില്ല. അങ്ങനെയാണെങ്കില്‍ ആ സമ്മാനത്തിനുള്ള പണം അവരുടെ അക്കൗണ്ട് ക്യൂആര്‍ കോഡ് സ്‌കാന്‍ ചെയ്ത് അയച്ചാലോ. !കല്യാണക്കുറിയില്‍ ക്യൂആര്‍ കോഡ് എന്ന ആശയവുമായി എത്തിയ വധുവും വരനുമാണ് ഇപ്പോള്‍ സോഷ്യല്‍ മീഡിയയില്‍ ചര്‍ച്ചയാകുന്നത്.
വിവാഹത്തിന് പങ്കെടുത്ത് സമ്മാനങ്ങള്‍ നല്‍കാന്‍ കഴിയാത്തവര്‍ക്ക് ഓണ്‍ലൈന്‍ സ്ട്രീമിങ്ങും ഒപ്പം സമ്മാനങ്ങള്‍ക്ക് പകരം അതിന് ചിലവാകുന്ന തുക ഗൂഗിള്‍ പേ അല്ലെങ്കില്‍ ഫോണ്‍പേ വഴിയോ ചെയ്യാനായി കല്യാണക്കുറിയില്‍ ഇതിനുള്ള ക്യൂആര്‍ കോഡ് സൗകര്യമാണ് അവര്‍ ഒരുക്കിയിരിക്കുന്നത്.
ഞായറാഴ്ചയായിരുന്നു മധുരൈയിലുള്ള ഈ വധൂവരന്മാരുടെ വിവാഹം. കല്യാണക്കുറി വൈറലായതിന് പിന്നാലെ നിരവധി ഫോണ്‍ കോളുകളും അന്വേഷണങ്ങളും വന്നതായി വധുവിന്റെ അമ്മ പറഞ്ഞു. വിവാഹത്തിന് ക്ഷണിച്ചവരില്‍ മുപ്പതോളം പേര്‍ ഈ സൗകര്യം ഉപയോഗപ്പെടുത്തിയതായും അവര്‍ പറഞ്ഞു.
