സംഗീതാസ്വാധകരുടെ പ്രിയ ഗായികയാണ് റിമി ടോമി. സോഷ്യൽ മീഡിയയിൽ ഏറെ സജീവമായ താരങ്ങളിൽ ഒരാളാണ് റിമി ടോമി. റിമി ടോമി ഡാൻസിനും പാട്ടിനുമൊപ്പം പാചകവും പരീക്ഷിച്ചിരുന്നു. യൂടൂബ് ചാനലിനും ഗംഭീര സ്വീകരണമാണ് ലഭിച്ചത്. ചാനൽ തുടങ്ങിയ ഉടനെ നിരവധി സബ്സ്‌ക്രൈബേഴ്സിനെയും റിമി ടോമിക്ക് ലഭിച്ചിരുന്നു. തന്റെ പാചക പരീക്ഷണങ്ങളും തരംഗമായ പാട്ടുകളുടെ കവർ വേർഷനുകളുമെല്ലാം യൂടൂബ് ചാനലിലൂടെ റിമി പങ്കുവെക്കാറുണ്ട്.
താരത്തിന്റെ പെട്ടെന്നുണ്ടായ മാറ്റത്തിന് പിന്നിലെ കാരണം തിരക്കി നിരവധി ആളുകളാണ് രംഗത്തെത്തിയത്. തന്റെ ഈ മാറ്റത്തെ പറ്റി പറഞ്ഞുള്ള റിമിയുടെ പോസ്റ്റാണ് ശ്രദ്ധേയമാവുന്നത്. വർഷങ്ങളോളം നീണ്ട യാത്രയെ പറ്റി പറഞ്ഞാണ് ഇൻസ്റ്റാഗ്രാമിലൂടെ ഒരു വീഡിയോ റിമി പുറത്ത് വിട്ടത്.
വർക്കൗട്ടിനിടയിൽ ജിമ്മിൽ നിന്നുമെടുത്ത വ്യത്യസ്തമായ ദൃശ്യങ്ങൾ കോർത്തിണക്കിയൊരു വീഡിയോയാണ് റിമി പങ്കുവെച്ചിരിക്കുന്നത്. മാത്രമല്ല താൻ സ്വയം വെല്ലുവിളി നടത്തിയത് കൊണ്ടാണ് ഇങ്ങനെയായതും ആ യാത്ര ആറ് വർഷം പൂർത്തിയാക്കിയെന്നും വീഡിയോയ്ക്ക് നൽകിയ ക്യാപ്ഷനിലൂടെ താരം പറഞ്ഞിരിക്കുകയാണ്.
‘നമ്മൾ സ്വയം ചാലഞ്ച് ഏറ്റെടുത്തില്ലെങ്കിൽ, മാറ്റം ഉണ്ടാവുകയില്ല. ഫിറ്റ്‌നസ്സ് യാത്രയുടെ ആറ് വർഷങ്ങൾ പൂർത്തിയാക്കുന്നു. (2018 മുതൽ 2024 വരെ) ദൈവത്തിന് നന്ദി’ എന്നുമാണ് വീഡിയോയ്ക്ക് നൽകിയ ക്യാപ്ഷനിൽ റിമി കുറിച്ചത്. അതേ സമയം റിമിയുടെ പോസ്റ്റിന് താഴെ ആശംസകൾ അറിയിച്ച് കൊണ്ടുള്ള നൂറ് കണക്കിന് കമന്റുകളാണ് വരുന്നത്.
ഇഷ്ടമുള്ള വസ്ത്രം ധരിക്കാൻ വേണ്ടിയാണ് മേക്കോവറിനെ കുറിച്ച് ചിന്തിച്ചതെന്ന് റിമി ടോമി നേരത്തെ പറഞ്ഞിരുന്നു. ശരീര ഭാരം കുറയുമ്പോൾ ഇഷ്ടമുള്ള വസ്ത്രം ധരിക്കാം. സാരി ഉടുക്കാൻ ഒരുപാട് ഇഷ്ടമാണ്. വയറ് നിറയെ ഭക്ഷണം കഴിച്ച ശേഷം സാരി ഉടുക്കുന്നത് വലിയ ബുദ്ധിമുട്ടായിരുന്നുവെന്നും റിമി ടോമി തുറന്നു പറഞ്ഞിരുന്നു.
