ഗുരുവായൂര്. ഗുരുവായൂർ ക്ഷേത്രത്തിലെ മേൽശാന്തിയായി പാലക്കാട് തെക്കേ വാവന്നൂർ പൊട്ടക്കുഴി മന വൃന്ദാവനത്തിൽ ശ്രീനാഥ് നമ്പൂതിരിയെ തിരഞ്ഞെടുത്തു. ഒക്ടോബര് ഒന്നു മുതല് അടുത്ത ആറ് മാസത്തേക്കാണ് കാലാവധി. ഇന്നു ഉച്ചപൂജയ്ക്ക് ശേഷം ക്ഷേത്രം തന്ത്രി പി.സി.ദിനേശന് നമ്പൂതിരിപ്പാടിന്റെ സാന്നിധ്യത്തിലായിരുന്നു നറുക്കെടുപ്പ്. നിലവിലെ മേല്ശാന്തി തോട്ടം ശിവകരന് നമ്പൂതിരിയാണ് നമസ്ക്കാര മണ്ഡപത്തില് വെച്ച് വെള്ളിക്കുടത്തില് നിന്ന് നറുക്കെടുത്തത്.
മേല്ശാന്തി തെരഞ്ഞെടുപ്പില് കൂടിക്കാഴ്ചയ്ക്കായി ക്ഷണിച്ച 45ല് 41 പേര് ഹാജരായി. ഇവരില് നിന്നും യോഗ്യത നേടിയ 40 പേരുടെ പേരുകള് എഴുതി വെള്ളിക്കുടത്തില് നിക്ഷേപിച്ച ശേഷമാണ് നറുക്കിട്ടത്. തെരഞ്ഞെടുക്കപ്പെടുന്ന മേല്ശാന്തി ക്ഷേത്രത്തിലെ ഭജനത്തിനു ശേഷം അടയാളചിഹ്നമായ താക്കോല്ക്കൂട്ടം ഏറ്റുവാങ്ങി പുറപ്പെടാ ശാന്തിയായി ചുമതലയേല്ക്കും.
ദേവസ്വം ചെയര്മാന് ഡോ.വി.കെ.വിജയന്, ഭരണ സമിതി അംഗങ്ങളായ മല്ലിശ്ശേരി പരമേശ്വരന് നമ്പൂതിരിപ്പാട്, സി മനോജ്, കെ.ആര് ഗോപിനാഥ്, വി.ജി.രവീന്ദ്രന് അഡ്മിനിസ്ട്രേറ്റര് കെ.പി.വിനയന് എന്നിവര് ചടങ്ങില് സന്നിഹിതരായി.