താരസംഘടനയായ ‘അമ്മ’യും മോഹൻലാലും സെലിബ്രിറ്റി ക്രിക്കറ്റ് ലീഗിൽ നിന്ന് പിൻമാറി. മാനേജ്മെൻറുമായുള്ള ഭിന്നതയെത്തുടർന്നാണ് താരസംഘടനയുടെ പിന്മാറ്റം. ടീമിൻറെ നോൺ പ്ലേയിങ് ക്യാപ്റ്റൻ ആയ മോഹൻലാൽ പദവിയിൽ നിന്ന് പിന്മാറുന്നതായി അറിയിച്ചു. ആനയെ വെച്ച് നടത്തിയിരുന്ന ഉത്സവം കുഴിയാനയെ വെച്ച് നടത്തുന്ന പോലെയാണ് ഇപ്പോഴത്തെ സെലിബ്രിറ്റി ക്രിക്കറ്റ് ലീഗെന്ന് ‘അമ്മ’ ജനറൽ സെക്രട്ടറി ഇടവേള ബാബു കുറ്റപ്പെടുത്തി.
തമിഴ് താരങ്ങളായ രാജ്കുമാർ സേതുപതിയും ഭാര്യ ശ്രീപ്രിയയും ഷാജി ജെയ്സണുമാണ് നിലവിൽ കേരള സ്ട്രൈക്കേഴ്സിൻറെ ഉടമസ്ഥർ. ലീഗിൽ കുഞ്ചാക്കോ ബോബനും ഉണ്ണി മുകുന്ദനുമാണ് ടീമിനെ നയിക്കുന്നത്. എന്നാൽ ഇനി ടീം മത്സരിക്കുക സ്വന്തം നിലക്കാണെന്നും കേരള സ്ട്രൈക്കേഴ്സിനും ‘അമ്മ’യെന്ന താരസംഘടനയ്ക്കും യാതൊരു ബന്ധവുമില്ലെന്നും ‘അമ്മ’ ജനറൽ സെക്രട്ടറി ഇടവേള ബാബു വ്യക്തമാക്കി.
ഈ സീസണിൽ കേരള സ്ട്രൈക്കേഴ്സിന് തോൽവിയോടെയാണ് ആരംഭിച്ചത്. കോവിഡ് മഹാമാരിയെത്തുടർന്ന് മൂന്ന് വർഷത്തെ ഇടവേളയ്ക്ക് ശേഷമെത്തിയ സെലിബ്രിറ്റി ക്രിക്കറ്റ് ലീഗിൽ ചരിത്രത്തിലെ ഏറ്റവും മോശം പ്രകടനമാണ് സ്ട്രൈക്കേഴ്സ് കാഴ്ചവെച്ചുകൊണ്ടിരിക്കുന്നത്. കളിച്ച രണ്ട് മത്സരങ്ങളിലും ദനയീയ തോൽവിയാണ് ടീം വഴങ്ങിയത്. ആദ്യ മത്സരത്തിൽ തെലുങ്ക് വാരിയേഴ്സിനോട് പരാജയപ്പെട്ട കേരള സ്ട്രൈക്കേഴ്സ് കഴിഞ്ഞ മത്സരത്തിൽ കർണാടക ബുൾഡോസേഴ്സിനോടും എട്ട് വിക്കറ്റിൻറെ ദയനീയ തോൽവി ഏറ്റുവാങ്ങിയിരുന്നു.
