എറണാകുളം : പറവൂരില്‍ ചരക്കുലോറിയും മിനി പിക്കപ്പ് വാനും കൂട്ടിയിടിച്ച് വാഹനാപകടം. എറണാകുളം തുരുത്തിപ്പുറത്ത് ഇന്ന് രാവിലെയാണ് അപകടമുണ്ടായത്. പിക്കപ്പ് വാനിലെ ഡ്രൈവർ ഉറങ്ങിപ്പോയതാണ് അപകടത്തിന് കാരണമായതെന്നാണ് പ്രാഥമിക നിഗമനം.
അപകടത്തിൽപ്പെട്ട ഡ്രൈവറെ ഗുരുതരമായി പരിക്കുകളോടെ പറവൂരിലെ സ്വകാര്യ ആശുപത്രിയിൽ പ്രവേശിപ്പിച്ചു. അതേസമയം തിരൂരിൽ നിയന്ത്രണം വിട്ട സ്കൂട്ടർ മതിലിൽ ഇടിച്ചുണ്ടായ അപകടത്തിൽ ചികിത്സയിലായിരുന്ന യുവാക്കൾ മരിച്ചു. തലക്കടത്തൂർ പടിഞ്ഞാക്കരയിലെ കുടുക്കിൽ ഇബ്രാഹിമിൻ്റെ മകന്‍ ഇർഫാൻ(18), നാലുകണ്ടത്തിൽ വിനോദിൻ്റെ മകന്‍ മൃദുൽ (21) എന്നിവരാണ് മരിച്ചത്.
ഇരിങ്ങാവൂർ കുറുപ്പിൻപടിയിൽ ആയിരുന്നു അപകടം. ടർഫിലെ കളി കഴിഞ്ഞ് വീട്ടിലേക്ക് മടങ്ങുന്നതിനിടെ നിയന്ത്രണം വിട്ട സ്കൂട്ടർ മതിലിൽ ഇടിക്കുകയായിരുന്നു. അയൽവാസികളും കൂട്ടുകാരുമായ രണ്ട് പേരും ശനിയാഴ്ച രാത്രി 11.30 ക്ക് ഇരിങ്ങാവൂരിലെ ടർഫിൽ നിന്നും കളി കഴിഞ്ഞ് സ്കൂട്ടറിൽ വീടുകളിലേക്ക് വരുന്നതിനിടെയായിരുന്നു അപകടം.
