കഴിഞ്ഞ ദിവസമാണ് മണികണ്ഠൻ ആചാരിക്ക് ആൺകുഞ്ഞ് പിറന്നത്. താരം തന്നെയാണ് മകൻ ജനിച്ച വിശേഷം ആരാധകരെ അറിയിച്ചത്. കുഞ്ഞിനെയും കയ്യിലെടുത്ത് നിൽക്കുന്ന ചിത്രം എന്റെ വെളിച്ചം എന്ന അടിക്കുറിപ്പിലാണ് താരം പങ്കുവെച്ചിരിക്കുന്നത്. ആശുപത്രിയിൽ നിന്നുള്ളതാണ് ചിത്രം.
ബാലനാടാ എന്ന കുറിപ്പോടെ താരം തന്നെയാണ് മകന്റെ വരവ് ആരാധകരെ അറിയിച്ചത്. എനിക്ക് കുഞ്ഞ് പിറന്നിരിക്കുന്നു. നമസ്കാരം, എനിക്ക് കുഞ്ഞു പിറന്നിരിക്കുന്നു. ഞാൻ അച്ഛനായ വിവരം സന്തോഷത്തോടെ അറിയിച്ചു കൊള്ളട്ടെ. നിങ്ങളുടെ പ്രാർത്ഥനകളിൽ ഉൾപ്പെടുത്തിയതിന് നന്ദി പറയുന്നില്ല, നന്ദിയോടെ ജീവിച്ചു കൊള്ളാം എന്നാണ് താരം അന്ന് പോസ്റ്റ് ചെയ്തത്.
മണികണ്ഠൻ വിവാഹിതനായത് ഏപ്രിൽ 26നാണ്. ലോക്ക് ഡൗൺ ചട്ടങ്ങൾ അനുസരിച്ച് വിവാഹിതനായ താരം വിവാഹാവശ്യത്തിനായി നീക്കിവെച്ച പണം മുഖ്യമന്ത്രിയുടെ ദുരിതാശ്വാസനിധിയിലേക്ക് കൈമാറിയിരുന്നു. മരട് സ്വദേശിനിയായ അഞ്ജലിയുടെ കഴുത്തിൽ താലി ചാർത്തിയത് ത്യപ്പൂണിത്തുറ ക്ഷേത്രത്തിൽവെച്ചായിരുന്നു. കമ്മട്ടിപ്പാടം എന്ന രാജീവ് രവി ചിത്രത്തിലൂടെയാണ് മണികണ്ഠൻ ആചാരി മലയാളികൾക്ക് പ്രിയങ്കരനായത്. പിന്നീട് ഇതര ഭാഷകളിൽ അടക്കം മണികണ്ഠൻ മികച്ച ചില വേഷങ്ങൾ ചെയ്തു. കഴിഞ്ഞ വർഷം രജനീകാന്ത് ചിത്രമായ പേട്ടയിലൂടെ താരം തമിഴിലും അരങ്ങേറിയിരുന്നു.രാജീവ് രവിയുടെ തുറമുഖം ആണ് വരാനിരിക്കുന്ന സിനിമ.
