ഷാർജയിൽ നിന്നുള്ള യാത്രക്കാരി അടിവസ്ത്രത്തിനുള്ളിൽ ഒളിപ്പിച്ച് മൂന്നു ലക്ഷം ദിർഹം (81,688 ഡോളർ) വിലമതിക്കുന്ന ഒന്നരകിലോ സ്വർണം കടത്തി. ഷാർജയിൽ നിന്നുള്ള യാത്രക്കാരിയെ ഡൽഹി പൊലീസ് അറസ്റ്റ് ചെയ്തിട്ടുണ്ട്. യുവതിയുടെ പേരുവിവരങ്ങൾ പുറത്തുവിട്ടിട്ടില്ല.
യുഎഇയിൽ നിന്ന് ഡൽഹി ഇന്ദിരാഗാന്ധി രാജ്യാന്തര വിമാനത്താവളത്തിൽ വിമാനമിറങ്ങിയ യുവതിയുടെ ശരീരഭാഷയിൽ സംശയം തോന്നിയ കസ്റ്റംസ് ഉദ്യോഗസ്ഥർ ഇവരെ തടഞ്ഞു വെച്ച് പരിശോധിക്കുമ്പോഴാണ് അടിവസ്ത്രത്തിൽ അറകളുണ്ടാക്കി പേസ്റ്റ് രൂപത്തിലുള്ള സ്വര്‍ണം കടത്തുകയായിരുന്നു എന്ന് കണ്ടെത്തുന്നത്. സ്വർണം അടിവസ്ത്രങ്ങളിൽ എങ്ങനെ ഒളിപ്പിച്ചുവെന്ന് കാണിക്കുന്ന വിഡിയോ ഡൽഹി കസ്റ്റംസ് പിന്നീട് സോഷ്യൽ മീഡിയയിൽ പോസ്റ്റ് ചെയ്തിട്ടുണ്ട്.
ദുബായിൽ ഏറ്റവും കൂടുതൽ വ്യാപാരം നടക്കുന്ന വസ്തുക്കളിലൊന്നാണ് സ്വർണം. ലോഹം, വസ്ത്രങ്ങൾ, ഇലക്ട്രിക്കൽ ഉപകരണങ്ങൾ, ബാഗേജുകൾ, പല്ലുകൾ, വിഗ്ഗുകൾ തുടങ്ങിയ വഴികൾ ഇതിനോടകം പരീക്ഷിക്കുകയും പിടിക്കപ്പെടുകയും ചെയ്തു കഴിഞ്ഞു. കൊണ്ടുവരുന്ന സ്വർണത്തിന് തീരുവ നൽകാതിരിക്കാനാണ് സ്വർണം ഈ രീതിയിൽ ഒളിപ്പിച്ചുകടത്തുന്നത്.
