മലയാളികളുടെ പ്രിയപ്പെട്ട നടിയാണ് നിമിഷ സജയന്‍. ദിലീഷ് പോത്തന്‍ സംവിധാനം ചെയ്ത തൊണ്ടിമുതലും ദൃക്‌സാക്ഷിയും എന്ന ചിത്രത്തിലൂടെയാണ് നിമിഷ സിനിമയില്‍ അരങ്ങേറ്റം കുറിച്ചത്. തുടര്‍ന്ന് അങ്ങോട്ട് നിമിഷയ്ക്ക് തിരിഞ്ഞു നോക്കേണ്ടി വന്നിട്ടില്ല. നിരവധി ഹിറ്റ് ചിത്രങ്ങളുടെ ഭാഗമാകാന്‍ നിമിഷയ്ക്കായി. താരം സിനിമയിലും സിനിമയ്ക്ക് പുറത്തും മേക്കപ്പ് അങ്ങനെ ഉപയോഗിക്കാറില്ല. ഇപ്പോള്‍ താന്‍ മേക്കപ്പ് ഇടാത്തതിനെ കുറിച്ച് തുറന്ന് പറഞ്ഞിരിക്കുകയാണ് നിമിഷ. ഒരു മാധ്യമത്തിന് നല്‍കിയ അഭിമുഖത്തില്‍ സിനിമ മേഖലയെ കുറിച്ചും നിമിഷ തുറന്ന് പറഞ്ഞു.
സിനിമയില്‍ മേക്കപ്പ് വേണമെന്നത് നമ്മള്‍ കണ്ടു വന്ന ഒരു രീതിയാണ്. അത് തന്നെ പിന്തുടരണമെന്നില്ലല്ലോ.ഞാന്‍ ചെയ്യുന്ന എല്ലാ കഥാപാത്രങ്ങളും അടുത്ത വീട്ടിലെ പെണ്‍കുട്ടി എന്ന ഇമേജുള്ളവയാണ്.നിത്യ ജീവിതത്തില്‍ നമ്മുടെ ചുറ്റുമുള്ള എത്രപേരാണ് മേക്കപ്പ് ഉപയോഗിക്കുന്നത്. കൂടിപ്പോയാല്‍ ലിപ്സ്റ്റിക് ഇടുന്നവരെയല്ലേ നമുക്ക് കാണാന്‍ കഴിയുകയുള്ളൂ. കേരളത്തിലെ സ്ത്രീകളുടെ ധൈര്യത്തെ കുറിച്ചും മിടുക്കിനെ കുറിച്ചുമെല്ലാം അച്ഛന്‍ പറയുന്നത് കേട്ടാണ് ഞാന്‍ വളര്‍ന്നത്. അതായിരിക്കാം എന്നിലെ സ്വഭാവത്തെ രൂപപ്പെടുത്തിയത്. ഏതൊരു മേഖലയിലായാലും മുന്‍പന്തിയില്‍ ഒരു മലയാളി പെണ്‍കുട്ടിയുണ്ടാകും. കൂടാതെ കുട്ടിക്കാലം മുതല്‍ അച്ഛനും അമ്മയും എന്നെ പറഞ്ഞ് പഠിപ്പിച്ചത് മലയാളി പെണ്‍കുട്ടിയുടെ ശീലങ്ങളുമാണ്.
സിനിമയ്ക്കുള്ളിലെ അടുക്കള രാഷ്ട്രീയത്തിനോട് തീരെ യോജിപ്പില്ല. സിനിമ ഒരു കലാരൂപമാണ്. അത് എപ്പോഴും സംശുദ്ധമായിരിക്കണം,. അതില്‍ ഒരിക്കലും വ്യക്തി താത്പര്യങ്ങളോ ഗ്രൂപ്പിസമോ കടന്നു വരാന്‍ പാടില്ല. കണ്ണുകള്‍ കൊണ്ടുള്ള ഭാവങ്ങളാണ് അഭിനയിക്കാന്‍ ഏറ്റവും ഇഷ്ടം. ഈ അടുത്ത ഇടയില്‍ ഞാന്‍ ഏറ്റവും കൂടുതല്‍ ചെയ്തിട്ടുള്ളതും അതാണ്. നോട്ടം കൊണ്ടുള്ള റൊമാന്‍സ്. റൊമാന്‍സില്‍ മുന്‍പരിചയമൊന്നുമില്ല. എന്നാലും എനിയ്ക്ക് ഏറ്റവും കൂടുതല്‍ വഴങ്ങുന്നതും അതാണെന്ന് തോന്നുന്നുണ്ട്. സ്ത്രീകള്‍ക്ക് പ്രധാന്യം നല്‍കുന്ന സൈക്കോളജിക്കല്‍ ത്രില്ലറിനോടാണ് കൂടുതല്‍ ഇഷ്ടം. കൂടാതെ ഒരു സൈക്കോ കില്ലറായി അഭിനയിക്കുക എന്നതാണ് ഏറ്റവും വലിയ ആഗ്രഹം.- നിമിഷ അഭിമുഖത്തില്‍ പറഞ്ഞു.
