താര സംഘടനയായ ‘അമ്മ’യുടെ ഓഫിസിലെത്തി അംഗത്വം നേടാനുള്ള അപേക്ഷ നൽകി ശ്രീനാഥ് ഭാസി. അമ്മയുടെ നിയമപ്രകാരം എക്സിക്യൂട്ടീവിന്റെ അനുമതിക്കു ശേഷമേ അപേക്ഷ സ്വീകരിക്കാൻ നടപടി സ്വീകരിക്കുകയുള്ളൂ.ഡേറ്റ് നൽകാമെന്നു പറഞ്ഞു നിർമാതാവിൽ നിന്ന് അഡ്വാൻസ് വാങ്ങിയിട്ടും വട്ടംചുറ്റിച്ചുവെന്നും ഒരേസമയം പല സിനിമകൾക്കു ഡേറ്റ് കൊടുത്തു സിനിമയുടെ ഷെഡ്യൂളുകൾ തകിടം മറിച്ചുവെന്നുമുള്ള പരാതിയിലാണു ശ്രീനാഥ് ഭാസിയുമായി നിസ്സഹകരിക്കുമെന്നു ചലച്ചിത്ര സംഘടനകൾ പ്രഖ്യാപിച്ചത്.
നിർമാതാവുമായി ഒപ്പുവയ്ക്കുന്ന കരാറിൽ അമ്മയുടെ റജിസ്ട്രേഷൻ നമ്പർ ഉണ്ടാകണമെന്നും അല്ലാത്ത താരങ്ങളുടെ കാര്യത്തിൽ തങ്ങൾക്കു റിസ്കെടുക്കാനാകില്ലെന്നും സംഘടനകൾ വ്യക്തമാക്കിയതിനു പിന്നാലെയാണു ശ്രീനാഥ് ഭാസി അംഗത്വത്തിന് അപേക്ഷിച്ചത്.എഡിറ്റ് ചെയ്ത ഭാഗങ്ങളിൽ പ്രാധാന്യം കുറഞ്ഞുവെന്നതുമായി ബന്ധപ്പെട്ട് ഉണ്ടായ തർക്കങ്ങളാണു ഷെയ്നുമായുള്ള നിസ്സഹകരണത്തിനു കാരണമായത്. ഷെയ്ൻ അമ്മ അംഗമാണ്.
അതേസമയം, ശ്രീനാഥ് ഭാസിക്കെതിരെ മുൻപും പരാതികൾ ഉയർന്നിരുന്നു. അന്നൊക്കെ ആരോപണങ്ങളെ തള്ളിക്കളയുകയായിരുന്നു താരം ചെയ്തിരുന്നത്. മാസങ്ങൾക്ക് മുൻപ് ശ്രീനാഥ് ഭാസി ഒരു അഭിമുഖത്തിൽ പറഞ്ഞ കാര്യങ്ങളാണ് ഇപ്പോൾ വീണ്ടും വൈറലാകുന്നത്. തന്നെ വിലക്കാനുള്ള ശ്രമങ്ങൾ നടക്കുന്നുണ്ടെന്നും, താൻ കഷ്ടപ്പെട്ട് തന്നെ പണിയെടുക്കുമെന്നുമായിരുന്നു ശ്രീനാഥ് ഭാസി പറഞ്ഞത്. താൻ ഇനിയും സിനിമകളിൽ അഭിനയിക്കുമെന്നും, ഇല്ലെങ്കിൽ വല്ല വാർക്കപ്പണിക്കും പോകുമെന്നുമായിരുന്നു ശ്രീനാഥ് ഭാസി വെല്ലുവിളിച്ചിരുന്നത്. എന്നാൽ, വാർക്കപ്പണിക്ക് പോകുമെന്ന് പറഞ്ഞ് വീമ്പിളക്കിയ ആൾ തന്നെ തനിക്കെതിരെ നടപടിയെടുത്തപ്പോൾ നല്ല കുട്ടിയായല്ലോ എന്നാണ് സോഷ്യൽ മീഡിയ ചൂണ്ടിക്കാട്ടുന്നത്.
